Qazaqstan barysy Marat Baıqamurov: Bul jeńisimdi ákeme arnaımyn
ASTANA. KAZINFORM – «Qazaqstan barysy – 2025» týrnıriniń jeńimpazy Marat Baıqamurov bul jeńisin ákesine arnaıtynyn aıtty.
– Negizgi maqsat – taıtuıaq alý boldy. «Qazaqstan barysy» jobasy bastalǵanyna bıyl 14 jyl boldy. Osy ýaqytqa deıin Shymkent qalasy altyn taıtuıaq júldesin ıelenbegen edi. Bul júldeniń biz úshin orny erekshe, sebebi bul júldeni alý ońaı bolǵan joq, – dedi Marat Baıqamurov «Jibek Joly» telearnasyndaǵy «Búgin LIVE» baǵdarlamasynda.
Aıta keteıik, altyn belbeý men taıtuıaq júldesi jyl saıyn týrnır chempıonyna tabystalady. Ol tek úsh ret «Qazaqstan Barysy» ataǵyn jeńip alǵan sportshy ǵana ony ózinde qaldyra alady.
Balýan óz sózinde jeńisin ákesine arnaǵanyn atap ótti.
– «Ásker barysynan» keıin «Qazaqstan barysyndaǵy» jeńisimdi ákeme arnadym. Ol kisi ózi de sportqa jaqyn adam. Eshqashan meni belgili bir baǵytqa úgittegen emes, biraq sportpen aınalysýymdy árqashan qoldap keldi, – deıdi sportshy.
Buǵan deıin Prezıdenttiń «Qazaqstan barysy – 2025» týrnıriniń jeńimpazyn quttyqtaǵanyn jazǵan edik.