Qazaqstan bankteri Ónimdi jumyspen qamtý baǵdarlamasyna qatysýǵa múddelilik tanytýda
Bul týraly búgin Úkimettiń selektorlyq rejimdegi otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
««Damý» KDQ» AQ-nyń aqparatyna qaraǵanda, baǵdarlamaǵa qatysýǵa bank qoǵamdastyǵy tarapynan múddelilik baıqalýda. Mıkroqarjylyq uıymdar qaryz qarajattyń tómen tabystylyǵy sebebinen jáne qala turǵyndary men bıznesten olardyń nesıelik ónimderine naryqtyq mólsherleme boıynsha suranys bolýy esebinen baǵdarlamaǵa qatysýǵa ynta bildirmedi»,- dedi ol.
Onyń dereginshe, 10 mlrd teńge kólemindegi qarjy lımıti «Damý» qory sheshimimen baǵdarlama shartyna sáıkes fılıaldyq júıeleri kóp, Halyq bankiniń prýdentsııalyq jáne basqa da normatıvterin oryndap otyrǵan, merzimi ótken qaryzdarynyń úlesi tómen ekinshi deńgeıli 6 bankke berilgen. Qarjy lımıtterin «Qazaqstannyń Halyq banki» AQ, «Nurbank» AQ, «BankTsentr Kredıt» AQ, «Eýrazııalyq bank» AQ, «ATF Bank» jáne «Sberbank» AQ Enshiles banki alyp otyr.
Qarajatqa neǵurlym kóbirek suranys «Qazaqstannyń Halyq banki» AQ pen «Nurbank» AQ tarapynan jasaldy. Olardyń ótinishteri 2 mlrd teńgeden joǵary qarajatty quraıdy. 1 mlrd teńgeden joǵary qarajatty ıgerýge «BankTsentrKredıt» AQ, «Eýrazııalyq bank» AQ, «ATF Bank» AQ daıyn ekendigin bildirdi.
Bankterde 4,6 mlrd teńgeni ornalastyrý týraly sheshim qabyldandy. Onyń 1,3 mlrd teńgesi ekinshi deńgeıli bankterge aýdaryldy. «Damý» qorynyń málimetinshe, 3,3 mlrd teńge 2017 jylǵy 10 tamyzǵa deıin kommertsııalyq bankter tarapynan kelisimge qol qoıylǵannan soń aýdarylady. 5,4 mlrd teńge kólemindegi qalǵan qarjynyń alǵashqy bóligi ıgerilgennen keıin bankterge ornalastyrylady.
