Qazaqstan bankteri 180 keliden astam altyn quımalar satty
ALMATY. QazAqparat - QR Ulttyq banki Qazaqstan bankterinde altyn quıma satý qalaı júrgizilip jatqanyn aıtty, dep habarlaıdy QazAqparat tilshisi.
Ulttyq bank baspasóz qyzmetiniń habarlaýynsha, osy kúnge deıin 3 bank arqyly jalpy salmaǵy 180 keliden astam altyn quıma satylǵan.
Altyn quımalar ekinshi deńgeıdegi bankter - «Qazaqstannyń Halyq Banki» AQ, «Eýrazııalyq bank» AQ jáne «Tsesnabank» AQ arqyly satylýda.
«Altyn quımalar naryǵynyń tıimdiliginiń basty faktory - ekinshi deńgeıdegi bankter klıenterden aqshasyna olardy keri satyp alady. Quımalardyń 5, 10, 20, 50 jáne 100 gramdyq bes túri bar. Búgingi kúni bankter 180 kılogramnan astam altyn satqan», - delingen habarlamada.
QR Ulttyq bank tazartylǵan altynnyń 2 tonnasyn syrtqy naryqta erkin aıyrbastalatyn valıýtaǵa nemese otandyq óndirýshilerden jyl saıyn satyp alynatyn altyn kóleminiń shamamen 4% deıingi kólemde satý jónindegi operatsııany júzege asyrýdy kózdep otyr. Bul Qazaqstan óndirýshileri quımalarynyń tanymaldyǵyn arttyrý úshin jasalady.
Sonymen qatar jergilikti naryqta salmaǵy 12-13 keli altyn quımaǵa suranys bolǵan jaǵdaıda Ulttyq bank halyqqa mundaı quımalardy satýǵa daıyn.
Bul quımalar - ınvestordyń portfelindegi mańyzdy aktıv, ártaraptandyrý quraly bola alady.
Al jalpy Ulttyq bank altynynyń portfelinde qazir jalpy quny 13,5 mlrd AQSh dollary bolatyn 342 tonna altyn bar.
Bul kórsetkish baǵaly metall qory boıynsha Qazaqstandy álemde 15-orynǵa shyǵardy.
Baǵaly metaldaǵy aktıvterdi tolyqtyrý úshin tazartylǵan altyndy satyp alýǵa memlekettik basymdyq berilgeli beri Ulttyq bank otandyq óndirýshilerden shamamen 221 tonna tazartylǵan quıma altyndy satyp alǵan.
Esterińizge sala keteıik, 2017 jylǵy mamyrda Ulttyq bank halyq úshin tazartylǵan quıma altyndy satý jáne satyp alý jónindegi baǵdarlamany iske qosqan bolatyn.
