Qazaqstan bankteri úshin qarjylyq problemalardy erte eskertý júıesi engiziledi
ASTANA. KAZINFORM — Qazaqstanda bankterdiń qarjylyq turaqtylyǵynyń nasharlaý belgilerin resmı túrde bekitý josparlanyp otyr, dep habarlaıdy Kazinform agenttiginiń tilshisi.
Tıisti qaýly jobasyn Qarjy naryǵyn retteý jáne damytý agenttigi qoǵamdyq talqylaýǵa shyǵardy.
Qujat jańa «Bankter jáne bank qyzmeti týraly» zańdy iske asyrý aıasynda ázirlengen jáne retteýshi organǵa bankterdiń jaǵdaıynyń nasharlaý belgilerin aldyn ala anyqtaýǵa múmkindik beretin naqty kórsetkishterdi belgileýdi kózdeıdi.
Jobaǵa sáıkes, qarjylyq-ekonomıkalyq jáne ózge de turaqtylyq kórsetkishteri, sondaı-aq olardyń shekti mánderi aıqyndalatyn bolady.
Mundaı tásil táýekelderdi ýaqtyly anyqtaýǵa jáne bankterdiń qarjylyq jaǵdaıynyń yqtımal nasharlaý kezeńderin belgileýge múmkindik bermek.
Bul — erte áreket etý tetigin engizý: eger bank belgilengen kórsetkishterden aýytqı bastasa, retteýshi organ problemany erterek anyqtap, onyń kúrdeli jaǵdaıǵa jetpeı turyp tıisti shara qoldana alady.
Jańa erejeler bank sektorynyń jaǵdaıyn baǵalaýdyń ashyqtyǵyn arttyryp, qarjy ınstıtýttarynyń turaqtylyǵyna baqylaýdy kúsheıtedi dep kútiledi.
Qujat 2026 jylǵy 9 maýsymǵa deıin «Ashyq NQA» portalynda qoǵamdyq talqyǵa usynylady.
Buǵan deıin habarlanǵandaı, Qazaqstandaǵy bankter júrgizgen saýalnama nátıjesine sáıkes, 2026 jyldyń I toqsanynda bıznes tarapynan nesıege suranys azdap tómendegenimen, iri kompanııalar tarapynan ınvestıtsııalyq jobalarǵa qyzyǵýshylyq saqtalǵan.
