Qazaqstan bankteri 592 mlrd teńge paıda tapty
ASTANA. KAZINFORM — 2026 jylǵy 1 sáýirdegi jaǵdaı boıynsha Qazaqstan Respýblıkasynyń bank sektorynda ekinshi deńgeıdegi 23 bank bar, onyń ishinde 15 bank sheteldik qatysýmen, onyń ishinde 10 enshiles bank.
Qarjy naryǵyn retteý jáne damytý agenttiginiń baspasóz qyzmetiniń málimetinshe, naýryz aıynda bank sektorynyń aktıvteri 0,7%-ǵa ósip, 70,5 trln teńgege jetti. Negizgi ósim nesıe portfeliniń 43,4 trln teńgege deıin ulǵaıýymen baılanysty. Alaıda jyl basynan beri aktıvter 0,3%-ǵa tómendegen.
Ekonomıkaǵa berilgen kredıtter kólemi de artqan. Naýryzda bul kórsetkish 0,5%-ǵa ósip, 40,3 trln teńgeni qurady. Ósim negizinen halyqqa berilgen qaryzdardyń esebinen qamtamasyz etilgen. Máselen, tutynýshylyq nesıeler 16,9 trln teńgege, al ıpotekalyq qaryzdar 7,1 trln teńgege jetti.
Bızneske beriletin kredıtter de birshama óskenimen, ósim baıaý. Shaǵyn jáne orta bızneske (ShOB) berilgen qaryzdar 7,4 trln teńgege deıin ulǵaıdy. Al iri bızneske beriletin kredıtter kerisinshe 4,7 trln teńgege deıin qysqarǵan.
Aıta keterligi, naýryz aıynda bankter 3,2 trln teńgege jańa nesıe bergen. Bul ótken jyldyń sáıkes kezeńimen salystyrǵanda 10,2%-ǵa kóp. Onyń ishinde bızneske berilgen jańa qaryzdar 23,4%-ǵa artqan.
Depozıtter de ósim kórsetken. Rezıdentterdiń bankterdegi salymdary 46,6 trln teńgege jetip, bir aıda 1%-ǵa ulǵaıdy. Bul rette teńgedegi depozıtter kóbeıip, al shetel valıýtasyndaǵy salymdar azaıǵan. Sonyń nátıjesinde dollarlaný deńgeıi 19,9%-ǵa deıin tómendedi.
Sonymen qatar bank sektorynyń turaqtylyǵy joǵary deńgeıde saqtalyp otyr. Ótimdi aktıvter 19,7 trln teńgeni nemese jalpy aktıvterdiń 27,9%-yn quraıdy. Kapıtal jetkiliktiligi de normatıvterden áldeqaıda joǵary.
Alaıda bankterdiń tabystylyǵy tómendegen. 2026 jylǵy naýryz qorytyndysy boıynsha taza paıda 592 mlrd teńgeni qurap, ótken jylmen salystyrǵanda 10,8%-ǵa azaıǵan.
Osydan buryn MKK bankrottyq rásiminde azamattarǵa qandaı shyǵyndar júktelgenin túsindirdi.
