Qazaqstan balýandary Túrkııadaǵy týrnırden 12 altyn aldy
ASTANA. KAZINFORM – Túrkııanyń Antalııa qalasynda ótken Victory Cup halyqaralyq týrnırinde Qazaqstannyń U17 jáne U20 jas sanattaryndaǵy qurama komandalary tabysty óner kórsetti.
Jıyrmaǵa jýyq eldiń 800-den astam sportshysy qatysqan týrnırde Qazaqstan balýandary 8 altyn, 9 kúmis, 16 qola medal enshiledi.
Bozkilemge aldymen U17 jas sanatyndaǵy balýandarymyz shyǵyp, kúrestiń úsh túri boıynsha da jalpykomandalyq esepte birinshi orynǵa ıe boldy.
Atap aıtqanda, grek-rım kúresinde qazaqstandyq sportshylar 3 altyn, 1 kúmis jáne 8 qola medal jeńip aldy. Jańajol Qýanyshbek (51 kg), Asqar Nuralı (60 kg) jáne Tólesh Marlen (65 kg) óz salmaqtarynda top jaryp, komandanyń jalpy jeńisine úles qosty. Nátıjesinde bul baǵdarlamada Qazaqstan quramasy jalpykomandalyq birinshi orynnan kórindi. Ázerbaıjan ekinshi bolsa, Túrkııa úshinshi oryn aldy.
Osy qarqyn erkin kúreste de jalǵasyn tapty. Máselen, Baqdáýlet Aǵabek (48 kg), Temirlan Murat (55 kg) jáne Ádilet Rysbaı (71 kg) altyn júldege ıe bolyp, Qazaqstan quramasynyń kóshbasshylyǵyn nyǵaıtty. Jalpy esepte otandastarymyz 3 altyn, 3 kúmis jáne 4 qola medal jeńip alyp, bul synda da birinshi orynǵa shyqty.
Sondaı-aq, áıelder kúresinde de balýandarymyz joǵary deńgeıde óner kórsetti. Atap aıtqanda, Іnjý Baqqoja (46 kg) men Baǵjan Qurmanbaı (73 kg) altynnan alqa taǵyndy. Budan bólek, komanda qorjynyna 5 kúmis jáne 4 qola medal tústi. Osylaısha, Qazaqstan quramasy bul baǵdarlamada da jalpykomandalyq esepte birinshi oryn aldy. Túrkııa ekinshi, al Qyrǵyzstan úshinshi orynǵa turaqtady.
U20 jas sanatyndaǵy balýandar da júldeden tys qalǵan joq. Olar jekelegen salmaqtarda júldeli oryndarǵa ıe bolyp, komandalyq esepke óz úlesterin qosty.
Atap aıtar bolsaq, grek-rım kúresinde Ámirmuhammed Qabýlov (55 kg) altyn medal jeńip aldy. Óz kezeginde Alpamys Bolatuly (60 kg) men Erkebulan Anapııa (82 kg) kúmis júldege ıe boldy. Sondaı-aq, taǵy birneshe balýanymyz qola medal enshilep, U20 Qazaqstan quramasy bul baǵdarlamada úshinshi orynǵa turaqtady.
Erkin kúreste Ashab Hadjıev (86 kg) chempıon atansa, Erhan Ábil (79 kg) men Dinmuhammed Qasymbek (86 kg) qola júlde ıelendi. Bul synda Qazaqstan quramasy jalpy esepte besinshi oryn aldy.
Názik jandarǵa keler bolsaq, Anna Stratan (57 kg) men Uldana Tileýhan (68 kg) altyn júlde jeńip aldy. Budan bólek, qazaqstandyq balýandar 5 qola medal enshilep, komandalyq esepte ekinshi orynǵa ıe boldy.
Osylaısha, Antalııadaǵy halyqaralyq týrnırde Qazaqstannyń jas balýandary ártúrli jas sanattarynda joǵary nátıje kórsetip, el qorjynyna júldeni molynan saldy.
Aıta ketelik Nazym Qyzaıbaı bokstan álem kýbogyn sátti bastady.
