Qazaqstan balalaryn Brazılııa fýtbol akademııasyna jiberý múldem tıimsiz bolyp shyqty - A. Muhamedıuly

ASTANA. QazAqparat - Balalardy Brazılııa fýtbol akademııasyna jiberý múldem tıimsiz bolyp shyqty. Sondyqtan da, aldaǵy ýaqytta qazaqstandyq jastar Germanııa men Nıderlandyda jattyǵýy múmkin. Búgin Májiliste ótip jatqan buqaralyq sportty jáne dene shynyqtyrýdy damytý taqyrybyndaǵy Úkimet saǵatynda depýtattar saýalyna jaýap bergen Mádenıet jáne sport mınıstri Arystanbek Muhamedıuly osylaı málim etti.

Jıyn barysynda depýtat Nurtaı Sábılıanov 2009 jyldan bastap Qazaqstan Brazılııa fýtbol akademııasyna jasóspirimderdi jiberip kele jatqanyn atap ótti. «Buǵan jylyna 100 mıllıon teńge ketedi. Bıyl 200 mıllıon tóleımiz, 25 bala 3 jyl boıy oqyp keledi. Osy ýaqytqa deıin elý bala Brazılııa akademııasyn bitiripti. Alaıda, olardyń eshqandaı da jetistigin kóre almaı otyrmyz. Brazılııadan kelgenderdi «Báıterek» klýbyna alyp keldik, ol klýb jeńilisten kóz ashqan joq. Qazaqstan jastar quramasynda da bar. Alaıda, Sankt Peterbordan olar eń sońǵy oryn alyp keldi. Bul qalaı?» - dedi depýtat N. Sabılıanov.

Óz kezeginde mınıstr Arystanbek Muhamedıuly Brazılııa fýtbol akademııasynyń shynymen de Qazaqstan jasóspirimderi úshin tıimsiz ekenin aıtyp, depýtattardyń synymen kelisetinin bildirdi.

«Bul úlken suraq. Biraz qarajat shyǵyndalǵanymen, shynynda da naqty nátıje joq. Shyndyǵyn aıtýymyz kerek, qazir osy máseleni qaıta qarap jatyrmyz. Óıtkeni, Brazılııada fýtboldyń álimdik juldyzdary shyqqanymen, tájirıbe júzinde olarda oqytý júıesi múldem basqa eken. Jattyqtyrýshylar dopty laqtyra salady, balalar oınasa da oınamasa da óz erki. Baıqasaq, ol jerdegi álemdik juldyzdar jastaıynan mektepke barmaǵandyqtan, táýlik boıy fýtbol oınap, sonymen kún kórgen eken. Sondyqtan da, bizge bul úrdis kelmeıdi eken», - dedi mınıstr.

Onyń aıtýynsha, osyǵan baılanysty Brazılııaǵa jasóspirimderdi jiberý toqtatylýy múmkin. Óıtkeni, ondaǵy jattyǵýdan nátıje shamaly bolyp otyr.

«Taldaý jasalyp jatyr. Máselen, fýtboldaǵy jasóspirimder úshin eń tıimdi mektepter Germanııa men Nıderlandyda eken. Biz qazir osy baǵytta júıeli túrde fýtbolmen aınalysatyndar úshin kelissózder júrgizip jatyrmyz», dedi A. Muhamedıuly.