Qazaqstan balalary zalaldy aqparattan qorǵalatyn bolady - Zań jobasy
ASTANA. 23 sáýir. QazAqparat -Búgin Májilistiń Áleýmettik-mádenı damý komıtetiniń kóshpeli otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasynyń tanystyrylymy bolyp ótti.
Ázirleýshilerdiń aıtýynsha, atalǵan zań jobasy memlekettiń «balany qalypty damýyna zardabyn tıgizetin aqparattar men materıaldardan qorǵaýdyń tıisti prıntspterin» ázirleýdi qamtamasyz etý jónindegi mindetterin oryndaýyna yqpal etetin bolady. Budan bólek, qujat balanyń óziniń «aqparattar men kez kelgen ıdeıany izdeý, alý, taratý bostandyǵyn» shekteýdiń qajettiligin ornyqtyrýdy kózdeıdi.
«Bul negizinen respýblıkamyzdyń zańnama isinde tuńǵysh ret qaralyp otyrǵan másele. Jobada elimizde balalardy buqaralyq aqparat quraldary arqyly taralatyn zalaldy aqparattan zań júzinde qorǵaý maqsatyn kózdep otyrmyz. TMD elderi men álemdik qaýymdastyq bul oraıda bizden kósh ilgeri ketken. Kóptegen memleketterde BUU-nyń Balalardy qorǵaý týraly 1989 jylǵy konventsııasyna sáıkestendirilgen zańnamalar bar. Atap aıtqanda, Eýropada kompıýterlik qylmystar týraly, elektrondyq aqparat quraldarynda zorlyq-zombylyqty kórsetpeý týraly zańdyq kúshi bar deklaratsııalar, TMD elderinde balalardyń memlekettegi quqyqtarynyń negizgi kepildikteri týraly úlgi zańdary bar. Budan bólek, biz AQSh, Kanada, Germanııa, Ulybrıtanııa, Norvegııa, Japonııa, Nıderlandy, Frantsııa sekildi taǵy da basqa elderdiń osy tektes zańdaryn saraladyq», - deıdi zań jobasynyń bastamashylarynyń biri depýtat Aldan Smaıyl.
Onyń aıtýynsha, sheteldik ozyq zańnamalarda balalardy adamgershilik sezimnen sýytatyn, psıhıkasyna, densaýlyǵyna zardabyn tıgizetin, qatygezdikti nasıhattaıtyn, bir sózben aıtqanda, jetkinshekti rýhanı azdyratyn aqparattardan qorǵaýǵa baǵyttalǵan quqyqtyq sharalar meılinshe eskerilgen.
Bul rette usynylyp otyrǵan zań jobasynda «Bala quqy týraly» Qazaqstannyń zańynda aıqyndalǵan balalardy densaýlyǵyna, adamgershilik jáne rýhanı damýyna zardabyn tıgizetin aqparttardan, olardy nasıhattaý men úgitteýden qorǵaıtyn kepildikterdi ulttyq zańnamada júzege asyrý múmkindikteri qaralady.
