«Qazaqstan balalary» tujyrymdamasy 1,3 trln teńge kóleminde qarjylandyrylady
ASTANA. KAZINFORM — «Qazaqstan balalary» tujyrymdamasy 1,3 trln teńge kóleminde qarjylandyrylady. Búgin Úkimet otyrysynda Oqý-aǵartý mınıstri Juldyz Súleımenova «Qazaqstan balalary» tujyrymdamasyn tanystyrdy.
- Memleketimiz qabyldaǵan júıeli sharalar jáne qol jetkizilgen nátıjeler «Qazaqstan balalary» biryńǵaı tujyrymdamasyna negiz boldy. Tujyrymdama balalardyń quqyǵyn qorǵaýdyń birizdiligin jáne sharalardyń tıimdiligin arttyrady. Balalardyń negizgi quqyqtaryn qamtıtyn tórt baǵyttan turady. Olar: balalardyń qaýipsizdigi, bilim, densaýlyq, otbasyǵa jáne áleýmettik qorǵaýdaǵy quqyqtary, - dedi ol.
Mınıstrdiń aıtýynsha, tıimdilikti baǵalaý úshin 10 ındıkator qarastyrylǵan, naqty iske asyrý úshin 158 is-shara josparlanǵan. Qarjylandyrýdyń jalpy kólemi 1,3 trln teńge.
- «Qaýipsizdik» baǵyty aıasynda qazirgi jaǵdaıdy eskere otyryp, jumys jandandyrylady. Eń aldymen, «Adal azamat» baǵdarlamasy aıasynda «Zań jáne tártip» prıntsıpin keńeıtý kózdelip otyr. Bul árbir balanyń ómiri, oqýy jáne damýy úshin qaýipsiz ortany qamtamasyz etedi. «Taza Qazaqstan» aktsııasy balalardy tárbıeleýdiń ıdeologııalyq platformasy retinde negizge alynady. Búgingi kúni elimizde 20 psıhologııalyq qoldaý ortalyǵy jumys isteıdi, barlyq mektepte qaýipsizdik sabaqtary men «111» baılanys ortalyqtary engizilgen, - dedi Juldyz Súleımenova.
Buǵan deıin Juldyz Súleımenova «Qazaqstan balalary» tujyrymdamasyn tanystyrǵanyn jazǵan edik.