«Qazaqstan balalary» biryńǵaı baǵdarlamasy ázirlenip jatyr

ASTANA. KAZINFORM – Memlekettik keńesshi Erlan Qarın Býrabaıda ótken Ulttyq quryltaıdyń IV otyrysynda aıtylǵan Prezıdent tapsyrmalarynyń oryndalýy jóninde jıyn ótkizdi. Keńeste Prezıdent Ákimshiligi jaýapty qurylymdyq bólimsheleriniń basshylary baıandama jasady.

Jıyn barysynda Memleket basshysynyń bastamalary aıasynda ishki saıasat salasynda tujyrymdamalyq qujat pen Nashaqorlyqqa jáne esirtki bıznesine qarsy kúres jónindegi 2026-2028 jyldarǵa arnalǵan keshendi jospar jobalarynyń ázirlengeni, sondaı-aq «Qazaqstan balalary» biryńǵaı baǵdarlamasynyń daıyndalyp jatqany atap ótildi.

Buǵan qosa erekshe qajettilikteri bar balalarǵa kórsetiletin qoldaýdy retteý, tarıhı-mádenı mura nysandaryn qorǵaý, kórsetiletin qyzmetter týraly aqparatqa qoıylatyn talaptardy kúsheıtý (arnaıy bilimi joq koýchtar men psıhologtardyń qyzmeti), ǵylymı qalashyqtardy qurý jáne t.b. jóninde zańnamalyq normalar ázirlenip jatyr.

Sondaı-aq Kókshetaý qalasynda kóp fýnktsıonaldy sport kesheniniń jáne Atyraý qalasyndaǵy ońaltý ortalyǵynyń qurylys jumystary aıaqtalýǵa jaqyn.

Erlan Qarın Prezıdent bastamalary túrli baǵyttardy qamtıtynyn eske saldy.

«Memleket basshysynyń Ulttyq quryltaıda jarııalaǵan reformalary áleýmettik-mádenı jobalardan bastap, ekonomıkalyq jáne ınfraqurylymdyq bastamalarǵa deıingi san alýan baǵyt boıynsha júzege asyrylyp jatyr», dedi ol.

Bul rette tapsyrmalardyń barlyǵyn Ulttyq quryltaı hatshylyǵy turaqty baqylaýda ustap otyr.

Keńes sońynda Memleket basshysynyń keıbir tapsyrmalary boıynsha Prezıdent Ákimshiligi jáne Úkimet deńgeıinde jekelegen naqty jıyndar uıymdastyrylatyny aıtyldy.

Aıta keteıik, Erlan Qarın Memlekettik syılyq berý jónindegi komıssııa otyrysyn ótkizdi.