«Qazaqstan balalary» baǵdarlamasyn ázirleý jumystary bastaldy

ASTANA. KAZINFORM – «Qazaqstan balalary» biregeı baǵdarlamasyn ázirleý jumystary bastaldy. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.

- Memleket basshysynyń tapsyrmasymen Balalardyń quqyqtary jónindegi ýákilmen birlesip, Parlament depýtattaryn jáne qoǵamdyq uıym ókilderin tartý arqyly «Qazaqstan balalary» biregeı baǵdarlamasyn ázirleý jumystary bastaldy, - dedi vıtse-premer jaýabynda.

Esterińizge sala ketsek, Memleket basshysy Qasym-Jomart Toqaev Ulttyq quryltaıdyń tórtinshi otyrysynda jergilikti bılik ókilderi men qoǵam belsendileri turmystyq zorlyq-zombylyqtyń aldyn alý jumysynan shet qalyp otyrǵanyn aıtqan edi.

- Onyń ústine, osy baǵyttaǵy jumystar qazir ártúrli qujatpen retteledi. Shashyrańqy bolyp tur. Sonyń bárin bir jerge jınaqtaǵan durys dep oılaımyn. Osyǵan oraı, «Qazaqstan balalary» atty birtutas baǵdarlama qabyldaǵan jón. Ozyq oıly urpaq ósirý úshin bilim men tárbıe árdaıym qatar júrýi kerek. Bul óte mańyzdy qujat bolmaq. Ony daıyndaý úshin Úkimet, Parlament depýtattary, ombýdsmen Dınara Zákıeva, qoǵam qaıratkerleri óz úlesin qosady dep oılaımyn. Ashyǵyn aıtsaq, bala oqytý isinde buǵan deıin bilimge kóbirek nazar aýdaryldy. Al urpaq tárbıesine qatysty júıeli ustanym bolǵan joq. Bul salaǵa tıisti deńgeıde kóńil bólinbeı keldi. «Tárbıesiz berilgen bilim – adamzattyń qas jaýy». Sondyqtan bilimmen qatar tárbıege aıryqsha nazar aýdarý óte mańyzdy, - degen bolatyn Memleket basshysy.

Aıta keteıik, bıyl balalar men jasóspirimder qozǵalysyn damytýdyń jańa tásilderi qabyldanady.