Qazaqstan bala quqyǵy jóninen álemdik reıtıngte úzdik 25 eldiń qataryna endi
ASTANA. KAZINFORM – Qazaqstan balalar quqyqtaryn baǵalaıtyn KidsRights 2026 jahandyq ındeksinde 24-orynǵa turaqtady. El 0,797 ball jınap, balalar quqyqtarynyń saqtalýy men ál-aýqaty deńgeıi boıynsha álemdegi úzdik 25 memlekettiń qataryna endi.
KidsRights 2026 ındeksin Rotterdamdaǵy Erazmýs ýnıversıteti halyqaralyq KidsRights uıymymen birlesip ázirlegen. Zertteýge Birikken Ulttar Uıymynyń Bala quqyqtary týraly konventsııasyna qatysýshy 194 memleket qamtylǵan.
Baǵalaý bes negizgi baǵyt boıynsha júrgizilgen. Olar – balanyń ómir súrýi, densaýlyǵy, bilim alýy, qorǵalýy jáne damýyna qolaıly orta.
Reıtıngte 0,871 ballmen Nıderland kósh bastap tur. Qazaqstan 24-oryndy ıelenip, Shyǵys Eýropa, Kavkaz jáne Ortalyq Azııadaǵy birqatar elden joǵary nátıje kórsetti.
Óńir elderi arasynda Moldova 32-orynda, Ýkraına – 36, Grýzııa – 51, Ázerbaıjan – 60, Armenııa – 70-orynda tur. Al Qyrǵyzstan 82, Tájikstan 92, Ózbekstan 96-orynǵa jaıǵasqan.
Aıta keteıik, KidsRights ındeksi 2013 jyldan beri jarııalanyp keledi. Búginde bul ındeks úkimetter men halyqaralyq uıymdar áleýmettik jáne bilim berý salasyndaǵy saıasatty ázirleýde keńinen paıdalanatyn negizgi halyqaralyq kórsetkishterdiń biri sanalady.
Eske salaıyq, buǵan deıin álemniń birqatar elinde balalardyń ınternettegi qaýipsizdigin kúsheıtý maqsatynda áleýmettik jelilerdi paıdalanýǵa jas shekteýin engizý, ata-analardyń baqylaýyn kúsheıtý jáne tsıfrlyq platformalardyń jaýapkershiligin arttyrý baǵytynda túrli sharalar qolǵa alynǵany týraly jazǵan edik.
