Qazaqstan balalar dárigerleriniń ІH sezi óz jumysyn bastady
ALMATY. QazAqparat - Almatyda Pedıatrııa jáne balalar hırýrgııasy ǵylymı ortalyǵy men Qazaqstan Pedıatrlar Odaǵynyń uıymdastyrýymen «Pedıatrııa jáne balalar hırýrgııasynyń jetistikteri men perspektıvalary» atty Qazaqstan balalar dárigerleriniń ІH sezi onlaın-rejımde ótip jatyr, dep habarlaıdy QazAqparat tilshisi.
Sharaǵa alys jáne jaqyn shetelderdiń pedıatrııa jáne balalar hırýrgııasy salasyndaǵy jetekshi ǵalymdary men sarapshylary, sondaı-aq otandyq ǵalymdar men pedıatr dárigerler qatysyp jatyr.
Sezi QR Densaýlyq saqtaý mınıstri Alekseı Tsoı ashyp, Qazaqstan Respýblıkasynyń densaýlyq saqtaý júıesindegi pedıatrııalyq problemalardyń basymdylyǵyn atap ótti.
Plenarlyq májilistiń ashylý saltanatynda sonymen qatar, AQSh-tyń Jahandyq pedıatrııa departamentiniń basshysy, St.Jude Global dırektory Karlos Rodrıges Galındo jáne Ýkraına eliniń Ohmatdet ulttyq mamandandyrylǵan aýrýhananyń bas dırektory V.Jovnır quttyqtaý sóz sóıledi.
Úsh kún boıy ótetin sezd jumysyna AQSh, Chehııa, Ulybrıtanııa, Reseı, Ýkraına, Belarýs, Ázirbaıjan, Ózbekstan, Qyrǵyzstan jáne basqa da alys-jaqyn shetelderdiń mamandary qatysatyn bolady.
Sezd alańynda balalar jasyndaǵy aýrýlardy dıagnostıkalaý men emdeýdiń eń ózekti máseleleri talqylanady. Basqosý barysynda balalar hırýrgııasy, balalardaǵy sırek kezdesetin aýrýlardy dıagnostıkalaý men emdeýdiń jańa standarttary, ártúrli somatıkalyq jáne hırýrgııalyq patologııasy bar balalardy ońaltý jáne medıtsınalyq-áleýmettik beıimdeý, balalar jasyndaǵy qarqyndy terapııa men anestezıologııa, pedıatrııadaǵy aqparattyq tehnologııalardy damytý máseleleri qozǵalady.
Barlyǵy 14 ǵylymı sessııa barysynda 100-den astam baıandama jasalady.
Sezd aıasynda 23 sáýir kúni doktoranttar, magıstranttar jáne rezıdentterge arnalǵan «Jas zertteýshi: zamanaýı pedıatrııa men balalar hırýrgııasynyń syn-tegeýrinderi men damý perspektıvalary» atty jas ǵalymdar forýmy ótedi.
