Qazaqstan bala quqyǵyn qamtamasyz etý salasynda eleýli progreske qol jetkizdi
Eske sala keteıik, Bala quqyqtary týraly konventsııaǵa Táýelsiz Qazaqstannyń Prezıdenti Nursultan Nazarbaev 1994 jylǵy 16 aqpanda Nıý-Iorkte qol qoıǵan jáne Qazaqstan Respýblıkasynyń Parlamenti ratıfıkatsııalaǵan alǵashqy halyqaralyq sharttardyń biri bolyp tabylady.
Qazaqstannyń Bala quqyqtary týraly konventsııaǵa qol qoıýynyń 20 jyldyǵyn atap ótý elimizdegi bala quqyǵyn iske asyrý progressindegi basty kezeń bolyp tabylady. Bala quqyqtaryn qorǵaý, ana men balany qoldaý árdaıym, tipti táýelsiz Qazaqstannyń qalyptasýyndaǵy eń qıyn jyldary da memleket saıasatynyń eń mańyzdy basymdyqtarynyń biri boldy. Sonymen qatar, Bala quqyqtary týraly konventsııa álemdegi elderdiń basym kópshiligi ratıfıkatsııalaǵan halyqaralyq qujat bolyp tabylady.
«Ótken 20 jylda Qazaqstan bala quqyqtaryn, onyń ekonomıkalyq jáne áleýmettik salaýattylyǵyn qamtamasyz etý salasynda eleýli progreske qol jetkizdi dep aıtýǵa tolyq negiz bar. Bizdiń elimizde 18 jasqa deıingi balalar bes mıllıonnan astam jáne olar shamamen búkil halyqtyń úshten birin quraıdy. Jyl saıyn elimizde 300 myńnan astam bala dúnıege keledi, al ótken jyly 387 myń bala týyldy. Bul jyl saıyn bizdiń elimiz orta eseppen bir oblys ortalyǵy - qala halqynyń sanyna ósip otyrady degen sóz. Sonymen qatar, balalar múddesine oraı aýqymdy memlekettik baǵdarlamalar - bilim berýdi damytý baǵdarlamasy, «Salamatty Qazaqstan», «Balapan» baǵdarlamalary, Memlekettik jastar saıasatynyń tujyrymdamasy iske asyrylýda. Bala tárbıelep otyrǵan otbasylarǵa beriletin memlekettik járdemaqylar júıesi bir mıllıonnan astam adamdy qamtydy»,- dedi Májilis Tóraǵasynyń orynbasary Darıǵa Nazarbaeva.
Sonymen qatar, vıtse-spıker búgingi kúni Májiliste birqatar mańyzdy zań jobalarymen jumys atqarylyp jatqanyn atap ótti. Olardyń arasynda eń tómengi áleýmettik standarttar men kepildikter, balalardy densaýlyǵyna jáne damýyna zardabyn tıgizetin aqparattan qorǵaý týraly, memlekettik jastar saıasaty, metsenattyq jáne qaıyrymdylyq týraly zań jobalary bar.
«Biz osydan bir aı buryn depýtattar bastamashy bolǵan zań jobasyn talqyladyq, munyń máni «Árbir balaǵa - otbasy qajet» dep qarapaıym tujyrymdaýǵa bolady. Osy zań jobasymen jetim balalardy asyrap alýdyń ashyqtyǵyn arttyrý, yqtımal asyrap alýshylardy, patronat otbasylardy jáne qorǵanshylardy materıaldyq turǵydan yntalandyrý jáne t.b. boıynsha birqatar sharalar usynylyp otyr. Bul qujattyń naqty balalardyń taǵdyry úshin qanshalyqty mańyzdy ekenin osy zalda otyrǵandardyń barlyǵy da túsinedi»,- dedi D. Nazarbaeva.
Shara Májilistiń Áleýmettik-mádenı damý komıtetiniń bastamasymen Qazaqstan Respýblıkasynyń Parlamenti, Norvegııa Úkimetiniń, Eýropa odaǵy delegatsııasynyń jáne Qazaqstandaǵy BUU Balalar qorynyń (ıÝNISEF) qoldaýymen uıymdastyryldy.
