Qazaqstan Baký–Tbılısı–Jeıhan qubyry arqyly munaı tasymaldaý kólemin ulǵaıtady
ASTANA. KAZINFORM — QR Energetıka mınıstri Erlan Aqkenjenov Grýzııanyń Ekonomıka jáne turaqty damý mınıstri Marıam Kvrıvıshvılımen kezdesti. Grýzııa delegatsııasynyń resmı sapary aıasynda ótken bul jıynda energetıka salasyndaǵy ekijaqty yntymaqtastyq máselesi talqylandy. Bul týraly vedomstvonyń baspasóz qyzmeti málim etti.
Basqosýda Erlan Aqkenjenov áriptesin jańa qyzmetke taǵaıyndalýymen quttyqtap, onyń basshylyǵymen eki el arasyndaǵy ekonomıkalyq qatynastar jańa serpin alatynyna senim bildirdi.
Kezdesý barysynda taraptar ekijaqty yntymaqtastyqty keńeıtýge múddeli ekendikterin bildirdi. Mınıstrler energetıka salasyndaǵy ózara árekettesýdi ekonomıkalyq turaqtylyqtyń tiregi jáne óńirlik yqpaldastyqtyń mańyzdy faktory retinde atap ótti.
Elimizdiń bas energetıgi qazaqstandyq kómirsýtekterdi jetkizý baǵyttaryn ártaraptandyrýda Grýzııanyń strategııalyq mańyzdylyǵyna toqtaldy.
— Biz Grýzııa eliniń kólik ınfraqurylymynyń senimdiligi men turaqtylyǵyn joǵary baǵalaımyz. 2024 jyly Baký–Tbılısı–Jeıhan munaı qubyry arqyly 1,4 mıllıon tonna otandyq munaı tasymaldandy. Al bıyl tasymal kólemin 1,5 mıllıon tonnaǵa jetkizýdi josparlap otyrmyz, — dedi Erlan Aqkenjenov.
Sondaı-aq kezdesýde Grýzııadaǵy qazaqstandyq aktıvterdiń qazirgi qyzmeti men olardy damytýdyń perspektıvalyq baǵyttary jóninde pikir almasty. Atap aıtqanda, Batýmı teńiz porty men Batýmı munaı termınalynyń óńirlik logıstıkadaǵy mańyzy sóz boldy.
Suhbattastar «jasyl» energetıka salasyndaǵy iri jobalarǵa da erekshe toqtaldy. Taraptar Qazaqstannyń Ázerbaıjan jáne Ózbekstanmen birlesip iske asyryp jatqan Transkaspıı dálizi jobasy men Grýzııanyń Qara teńiz arqyly joǵary kerneýli kabel tartý jobasynyń yqpaldasý múmkindikterin talqylady. Ortalyq Azııany Eýropamen baılanystyratyn biryńǵaı energetıkalyq arterııany qalyptastyrýǵa degen qyzyǵýshylyqtaryn bildirdi.
Kezdesý sońynda taraptar energoresýrstardy tasymaldaýdyń tıimdiligin arttyrý jáne óńirlik energetıkalyq qaýipsizdikti nyǵaıtý maqsatynda belsendi dıalogty jalǵastyrýǵa ýaǵdalasty. Eki el de uzaqmerzimdi ári ózara tıimdi seriktestikke beıil ekendikterin jetkizdi.
Búgin sondaı aq, Úkimette Grýzııa men Qazaqstannyń saýda-ekonomıkalyq yntymaqtastyǵyn nyǵaıtý máselesi talqylandy.