Qazaqstan Bakýdegi Urban Expo kórmesinde ulttyq pavılondy tanystyrdy
ASTANA. KAZINFORM – Qazaqstan Bakýdegi Dúnıejúzilik qalalar forýmynyń (World Urban Forum 13) eń iri Urban Expo kórmesinde ekologııalyq, jaıly jáne turaqty qalalardy damytýdyń zamanaýı tásilderine arnalǵan ulttyq pavılondy tanystyrdy, dep habarlaıdy Kazinform agenttiginiń menshikti tilshisi oqıǵa ornynan.
Ekspozıtsııa ınfraqurylymdyq sheshimderdi, qoǵamdyq keńistikti abattandyrý jobalaryn, qalalyq ortany basqarýdyń tsıfrlyq tásilderin jáne kógaldandyrý salasyndaǵy bastamalardy qamtyǵan.
Pavılonda qalalardyń Klımattyq turaqtylyǵyn arttyrýǵa jáne zamanaýı ekologııalyq ortany qalyptastyrýǵa baǵyttalǵan Green ID jobasyna erekshe nazar aýdaryldy.
Qazaqstandyq pavılonnyń arhıtektýralyq tujyrymdamasy ekologııalyq taza materıaldardy, ashyq josparlaýdy jáne kógaldandyrý elementterin paıdalanýdy kózdeıdi. Ortalyq bóliginde qalalyq jáne ınfraqurylymdyq jobalardy, sondaı-aq zamanaýı qalalyq ınfraqurylym nysandarynyń maketterin tanystyrý úshin LED-ekran ornalastyrylǵan.
Astana qalasynyń ýrbanıstıka ortalyǵynyń ókili Elnar Bazyken atap ótkendeı, Qazaqstannyń ulttyq pavılony elimizdiń Ónerkásip mınıstrligimen birlesip uıymdastyrylǵan jáne qalalyq ortany damytýdyń keshendi tásilin kórsetedi.
- Pavılonda qoǵamdyq keńistikterdi abattandyrýdan bastap ekologııalyq sheshimder men kógaldandyrý jobalaryn engizýge deıingi qalalardy damytýǵa Qazaqstannyń keshendi kózqarasy usynylǵan. Ekspozıtsııa Qazaqstannyń ómir súrý sapasy, ekologııalyq turaqtylyq jáne tabıǵatpen úılesimdilik basymdyqqa aınalatyn zamanaýı, taza jáne qala turǵyndary úshin qolaıly qalalardy damytýǵa degen umtylysyn kórsetedi, - dep atap ótti ol.
Onyń aıtýynsha, pavılon tujyrymdamasy tabıǵı materıaldar men «jasyl» sáýlet elementterin paıdalana otyryp, eko-stılde jasalǵan. Keńistik iskerlik qarym-qatynas pen beıresmı kezdesýler úshin tiri ósimdiktermen jáne ashyq terrassalarmen tolyqtyrylǵan.
Qazaqstan Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Murat Rysdáýletov eldiń forýmǵa qatysýy Qazaqstannyń ýrbanıstıka salasyndaǵy zamanaýı tásilderin halyqaralyq qoǵamdastyqqa usynýǵa múmkindik beretinin atap ótti.
- Qazaqstanda qalalyq ortany damytýǵa júıeli kózqaras qalyptasyp keledi. Jańa qurylys kodeksi qalalyq ortanyń sáýletine, abattandyrylýyna jáne kórneki kelbetine biryńǵaı talaptar qalyptastyrýǵa múmkindik beretin qalalardyń dızaın-kodtaryn engizýdi kózdeıdi, — dedi ol.
Rysdáýletovtiń aıtýynsha, forýmǵa qatysý tájirıbe almasýǵa, halyqaralyq yntymaqtastyqty nyǵaıtýǵa jáne zamanaýı ýrbanıstik sheshimderdi ilgeriletýge yqpal etedi. Forým aıasynda qazaqstandyq delegatsııa turaqty damýǵa, qalalyq ortany tsıfrlandyrýǵa, Klımattyq beıimdelý máselelerine jáne ýrbanıstıkaǵa zamanaýı kózqarastarǵa arnalǵan taqyryptyq pikirtalastarǵa qatysady.
Buǵan deıin Bakýde Dúnıejúzilik qalalar forýmynyń 13-sessııasy bastalǵanyn jazǵan bolatynbyz.
