Qazaqstan Bakýdegi mınıstrler otyrysynda basymdyqtaryn aıqyndady
ASTANA. KAZINFORM – Bakýde Ázerbaıjan Respýblıkasynyń prezıdenti Ilham Álıev pen EO-nyń energetıka jáne turǵyn úı saıasaty jónindegi komıssary Dan Iorgensenniń qatysýymen Ońtústik gaz dálizi Konsýltatıvtik keńesiniń 12-shi mınıstrler otyrysy jáne «jasyl» energetıka boıynsha 4-shi mınıstrler otyrysy ótti. Bul týraly QR Energetıka mınıstrligi habarlady.
Jıynǵa 27-den astam memlekettiń energetıka vedomstvalary men 49 halyqaralyq kompanııanyń ókilderi qatysty.
Halyqaralyq alańda Qazaqstannyń atynan QR Energetıka vıtse-mınıstri Sanjar Jarkeshov sóz sóıledi. Ol óz baıandamasynda Qazaqstan men Ázerbaıjan arasyndaǵy energetıka salasyndaǵy ózara is-qımyldyń strategııalyq sıpatyn atap ótti. Taraptar Ońtústik gaz dáliziniń áleýetin, offteıkerler tarapynan suranysty, «Baký-Tbılısı-Djeıhan» munaı qubyrynyń júktemesin jáne ózge de perspektıvalardy talqylady.
– Qazaqstan Ázerbaıjanmen energetıka salasyndaǵy strategııalyq áriptestikti joǵary baǵalaıdy, biz bul baǵytta yntymaqtastyqtyń jańa qyrlaryn damytýdyń zor áleýetin kórip otyrmyz. Qazaqstan, Ázerbaıjan jáne Ózbekstan arasyndaǵy «jasyl» energııany óndirý men berý jónindegi aýqymdy joba boıynsha ýaǵdalastyqtarymyzdy erekshe atap ótkim keledi. Memleket basshylary qol qoıǵan kelisim «jasyl» ınvestıtsııalardy tartý arqyly shyǵaryndylardy azaıtý jónindegi ekologııalyq maqsattarymyzǵa qol jetkizýge yqpal etedi, - dedi Sanjar Jarkeshov.
Joba ınstıtýtsıonaldyq turǵydan resimdelip úlgerdi: birlesken kásiporyn qurylyp, ony ratıfıkatsııalaý protsedýralary bastaldy.
Aıta keteıik, budan buryn joǵary aýdıtorlyq palatanyń ókilderi Ázerbaıjanda aýdıt júrgizgenin jazǵanbyz.