Qazaqstan Bakýde ótken EYU otyrysyna qatysty

BAKÝ. QazAqparat – Bakýde Ekonomıkalyq yntymaqtastyq uıymyna (EYU) múshe memleketterdiń aýyl sharýashylyǵy mınıstrleriniń 6-shy otyrysy ótti, oǵan Qazaqstannyń atynan Aýyl sharýashylyǵy vıtse-mınıstri Nurbek Daıyrbekov qatysty. Otyrys qorytyndysy boıynsha Aýyl sharýashylyǵy boıynsha Baký deklaratsııasy qabyldandy, dep habarlaıdy «QazAqparat» HAA tilshisi.

«Qazaqstan EYU qyzmetine qatysýǵa úlken mán beredi. Bul úshin óńirlik jáne kópjaqty yntymaqtastyqtyń tıimdiligi qajetti shart bolyp otyr. Qazaqstan Uıymdy oǵan múshe elder arasyndaǵy áleýmettik-ekonomıkalyq jáne tehnıkalyq yntymaqtastyqty damytý jónindegi pármendi qural retinde qarastyrady. EYU kópjaqty ekonomıkalyq yntymaqtastyq, tıimdi kommýnıkatsııalyq jeli úshin negiz bolyp otyr jáne keńeıtilgen aımaqtyń ekonomıkalyq jáne azyq-túlik qaýipsizdigi men turaqtylyǵyna járdemdesedi», - dep atap ótti vıtse-mınıstr.

Sondaı-aq N.Daıyrbekov qatysýshylardy Qazaqstannyń AÓK salasyndaǵy saıasaty týraly habardar etti.

«Qazaqstandaǵy aýyl sharýashylyǵy sektory ekonomıkanyń bolashaǵy zor salalarynyń biri, ony damytýǵa erekshe nazar aýdarylady jáne memleket tarapynan qoldaý kórsetiledi. QR - da sońǵy 5 jylda aýyl sharýashylyǵy ónimderin jáne ony qaıta óńdeý ónimderin óndirý 1,4 esege artty. AÓK eńbek ónimdiliginiń ortasha jyldyq ósý qarqyny 24%-dy qurady. Bul sala bıznes úshin tartymdy bolyp otyr. Osy ýaqyt ishinde sektorǵa 3,3 mlrd. teńge tartyldy. Sondaı-aq óndiris kólemin odan ári ulǵaıtý úshin úlken áleýetke ıe», - dedi N.Daıyrbekov.

Avtory Bekbaý Taımanov