Qazaqstan «Baký-Tbılısı-Djeıhan» qubyry arqyly munaı tasymalyn 2,2 mln tonnaǵa ulǵaıtady
ASTANA. KAZINFORM — «Baký-Tbılısı-Djeıhan» qubyry arqyly elimizde munaı tasymaly artady. Bul týraly QR Premer-mınıstriniń orynbasary — Syrtqy ister mınıstri Murat Nurtileý málim etti.
— Qazaqstandyq energııa resýrstaryn Ázerbaıjan arqyly álemdik naryqqa jetkizý jónindegi ýaǵdalastyǵymyz tabysty iske asyrylyp jatyr. Ótken jyly «Baký-Tbılısı-Djeıhan» qubyry arqyly sheteldik naryqqa 1,4 mln tonna munaı tasymaldanǵany málim. Aldaǵy ýaqytta qazaqstandyq munaıdyń tranzıtin jylyna 2,2 mln tonnaǵa deıin ulǵaıtý týraly kelisim bar, — dedi Murat Nurtileý BAQ ókilderi aldynda málimdeme jasaı turyp.
Sondaı-aq, mınıstr ázerbaıjandyq seriktesterimen birlesip, Qazaqstannyń ýrany shetelge júıeli jetkizilip jatqanyn tilge tıek etti.
— Qazaqstandyq energoresýrstardyń tasymaly men ınfraqurylymdyq jobalardy Kaspıı arqyly júzege asyrý Ońtústik Kavkaz ben Ortalyq Azııa arasyndaǵy baılanystyrýshy kópir ekeni aqıqat, — deıdi vedomstvo basshysy.
Aıta keteıik, búgin elordaǵa Ázerbaıjan Respýblıkasynyń Syrtqy ister mınıstri Djeıhýn Baıramov resmı saparmen keldi.
Sapar aıasynda ázerbaıjandyq mınıstr Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileýmen shaǵyn jáne keńeıtilgen quramda kelissóz ótkizdi.