Qazaqstan Baký-Sýpsa qubyryn munaı tranzıti úshin balama baǵdardyń biri retinde qarastyrady — Aqkenjenov
ASTANA. KAZINFORM — Qazaqstan Baký-Sýpsa qubyryn munaı tranzıti úshin balama baǵdardyń biri retinde qarastyrady. Bul týraly búgin Úkimet otyrysynan keıingi brıfıngte Energetıka mınıstri Erlan Aqkenjenov aıtty.
Onyń aıtýynsha, bul máselege qatysty ázirge Ázerbaıjan tarapymen tikeleı kelissóz júrgizilmegen.
— Ol úshin eń aldymen ózimizde, Qazaqstanda aıqyndap alýymyz qajet. Kaspıı qubyr konsortsıýmyna shabýyl saldarynan 3,5 mln tonna munaıdy shyǵara almadyq. Degemen, bul kólemde Aqtaý porty arqyly «Baký-Sýpsa» qubyry arqyly jónelte alar edik, — dedi Erlan Aqkenjenov.
Baký-Sýpsa munaı qubyrynyń ótkizý qabileti jylyna shamamen 5 mln tonna. Mınıstrdiń paıymynsha, Kaspıı qubyr konsortsıýmy arqyly munaı tasymalynda irkili bolǵan jaǵdaıda bul baǵdardy paıdalaný Qazaqstanǵa qarjydan qaǵylmaýǵa septigin tıgizedi.
— Baký-Sýpsa qubyry Qazaqstan úshin munaı tasymalynyń balama baǵdardyń biri retinde ómirlik qajettilik ekenin túsinemin. Bul qubyr men baǵdarǵa qarsylyq tanytatyndar atalǵan shabýyl saldarynan Qazaqstan neden qaǵylyp otyrǵanyn jete túsinbeıdi, — dedi ol.
Mınıstrdiń atap ótýinshe, óndirý ýaqytsha toqtatylǵan nemese eksporttyń shektelýine baılanysty óndirý kólemi qysqartylǵan ken oryndarynan alynatyn munaıdyń bir bóligi balama baǵdar arqyly jóneltiler edi.
Aıta keteıik, Kaspıı qubyr konsortsıýmyna jasalǵan shabýyldardyń saldarynan elimizde munaı óndirý kólemi 98 mln tonnadan 96 mln tonnaǵa deıin qysqartyldy.
