Qazaqstan Baqty – Aıagóz temirjol jelisin 2025–2027 jyldary iske asyrýǵa turaqty baqylaý ornatty
ASTANA. KAZINFORM — Qazaqstan Respýblıkasy Kólik vıtse-mınıstri Jánibek Taıjanov «Baqty – Aıagóz» temirjol jelisi qurylysy jobasyn iske asyrý máseleleri boıynsha «QTJ» UK» AQ jáne China HarbourEngineering Company ókilderiniń qatysýymen keńes ótkizdi. Bul týraly vedomstvonyń baspasóz qyzmeti málim etti.
Keńes barysynda jobany iske asyrý qarqyny, qurylys tehnıkasy men jumys kúshin jumyldyrý, qurylys materıaldarymen qamtamasyz etý, sondaı-aq qurylys-montaj jumystary kestesiniń oryndalýy máseleleri qaraldy.
Keńeske qatysýshylardyń málimetinshe, búgingi kúni ınjenerlik-geodezııalyq, geologııalyq jáne gıdrologııalyq izdestirý jumystary tolyq aıaqtalǵan. Qazirgi ýaqytta jobalyq-smetalyq qujattama ázirlenip, jer tósemin salý jumystary júrgizilýde. Búginde nysanda 613 birlik tehnıka men 958 jumysshy jumyldyrylǵan.
— Qazý jáne úıindi salý jumystary atqarylyp, qurylys ýchaskelerin qajetti materıaldarmen qamtamasyz etý sharalary júzege asyrylýda. Jánibek Taıjanov jobany belgilengen merzimde iske asyrýdyń mańyzdylyǵyn atap ótip, tehnıka men eńbek resýrstaryn ýaqytyly jumyldyrýdy, sondaı-aq qurylysqa qatysýshy barlyq tarap arasyndaǵy úılestirý jumystaryn kúsheıtýdi tapsyrdy. Keńes qorytyndysy boıynsha jumystardyń oryndalý barysyna turaqty monıtorıng júrgizip, jobany ýaqytyly iske asyrý úshin qajetti sharalar qabyldaý tapsyryldy, — delingen habarlamada.
«Baqty — Aıagóz» temirjol jelisiniń qurylysy eldiń kólik-tranzıttik áleýetin damytýǵa, temirjol jelisiniń ótkizý qabiletin arttyrýǵa jáne óńirler arasyndaǵy kólik baılanysyn nyǵaıtýǵa baǵyttalǵan. Jańa temirjol jelisiniń jalpy uzyndyǵy 303 shaqyrymdy quraıdy. Joba 2025–2027 jyldary júzege asyrylady.
Eske sala keteıik, buǵan deıin «Aıagóz – Baqty» jobasynyń iske asyrylý barysy Beıjińde talqylanǵan bolatyn.
