Qazaqstan-BAÁ: jalpy quny 900 mln dollar kommertsııalyq qujattarǵa qol qoıyldy

ASTANA. QazAqparat - Birikken Arab Ámirlikterine resmı saparmen barǵan QR Premer-Mınıstri Álıhan Smaıylov osy eldiń isker toptar ókilderimen kelissózder júrgizdi, dep habarlaıdy QazAqparat Úkimettiń resmı saıtyna silteme jasap.

Investorlarǵa taý-ken metallýrgııa kesheni, aýyl sharýashylyǵy, munaı-gaz salasy, qurylys jáne t. b. salalardaǵy jalpy somasy $6,5 mlrd-tan astam jańadan 40 ınvestıtsııalyq jobalar tizimi usynyldy.

Álıhan Smaıylov «Mubadala» tobynyń bas atqarýshy dırektory Mýsabbıh ál-Kaabımen kezdesti. «Mubadala» – baǵalaý aktıvteri $285 mlrd-ty quraıtyn jáne táýelsiz qorlardyń álemdik reıtınginde 13-orynǵa ıe memlekettik ınvestıtsııalyq-developerlik kompanııa.

«Energetıka, hımııa ónerkásibi, aýyl sharýashylyǵy, taý-ken metallýrgııa kesheni salalarynda áleýetimiz zor. Bul turǵyda álemdegi qazirgi jaǵdaıdy eskere otyryp, arnaıy ázirlengen jańa jobalardy iske asyrýǵa qatysýdy usynamyn», - dedi Álıhan Smaıylov.

Sondaı-aq Premer-Mınıstr aýyl sharýashylyǵy, energetıka jáne bank sektorynda birlesken jobalardy iske qosý perspektıvalaryn atap ótti.

«Qazaqstan Úkimeti ınvestıtsııalyq ahýaldy ári qaraı jaqsartady. Álemdegi daǵdarystyq qubylystarǵa qaramastan, osy jyldyń І toqsanynyń qorytyndysy boıynsha elimizge tartylǵan tikeleı sheteldik ınvestıtsııalar aǵyny 54%-ǵa ósip, $6,8 mlrd-ty qurady», - dep atap kórsetken Álıhan Smaıylov sheteldik seriktesterdi yntymaqtastyq úshin barlyq múmkindikterdi paıdalanýǵa shaqyrdy.

Óz kezeginde Mýsabbıh ál-Kaabı «Mubadala» kompanııasy Qazaqstanda ınvestıtsııalyq jobalardy iske qosý múmkindikterin jan-jaqty qarastyryp jatqanyn aıtty. Atap aıtqanda, jasyl energetıka, qarjy, taý-ken metallýrgııasy, munaı jáne gaz salalarynda yntymaqtastyqqa qyzyǵýshylyq tanytýda.

Sonymen qatar Premer-Mınıstr «ADQ» kompanııasynyń basqarýshy jáne bas atqarýshy dırektory Muhammed ál-Sýveıdımen kelissóz júrgizdi. «ADQ» – 90-nan astam kompanııaǵa tikeleı jáne janama ınvestıtsııalar quıǵan óńirdegi iri holdıng kompanııalardyń biri.

«Bul holdıngtiń qyzmet salasy óte aýqymdy, aýyl sharýashylyǵy, ónerkásip, logıstıka, densaýlyq saqtaý jáne t.b. salalardy qamtıdy. Olardyń barlyǵy biz úshin basym baǵyttar», - dep atap ótti Álıhan Smaıylov.

Óz kezeginde Muhammed ál-Sýveıdı usynylǵan múmkindikter úshin qazaqstandyq delegatsııaǵa alǵysyn bildirip, farmatsevtıka salasyna, azyq-túlik taýarlaryn óndirýge, logıstıkalyq baǵyttardy damytýǵa jáne jańartylatyn energetıkaǵa erekshe qyzyǵýshylyq tanytatynyn atap ótti.

Sonymen qatar Álıhan Smaıylov «Ayana Holding» kompanııasynyń tóraǵasy Abdýlla ben Lahedjben kezdesti, onda qurylys salasyndaǵy jobalardy iske asyrý máseleleri talqylandy.

Ekijaqty kezdesýlerdiń qorytyndysy boıynsha QR Premer-Mınıstriniń qatysýymen ekonomıkanyń túrli sektorlarynda jalpy somasy $900 mln bolatyn birqatar ekijaqty kommertsııalyq qujattarǵa qol qoıyldy.

Foto: primeminister.kz