Qazaqstan BAÁ kompanııalarynyń basqarýyna ındýstrııalyq aımaqtardy berýge ázir
ASTANA. QazAqparat - Qazaqstan Birikken Arab Ámirlikteri kompanııalarynyń basqarýyna ındýstrııalyq aımaqtardy berýge daıyn. Bul týraly búgin Qazaqstan-BAÁ bıznes-forýmynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Biz Ámirlikter bıznesiniń elimizdegi baǵdarlamalarǵa belsendi qatysýyn qarastyryp otyrmyz. Osy oraıda Qazaqstannyń Indýstrııalyq-ınnovatsııalyq damýy sekildi baǵdarlamasynyń orny erekshe. Sonymen qatar «Nurly jer» turǵyn úı qurylysy baǵdarlamasy bar. Bul turǵyda bizde naqty usynystar bar, sondyqtan bıznes-forýmnyń aıasynda jobalardy tyńǵylyqty talqylaýǵa ázirmiz»,-dedi mınıstr.
Mınıstr Qazaqstanda bıznes úshin memlekettik qoldaýdyń túrli sharalary qamtylǵanyn, sondaı-aq ınvestıtsııalyq jáne salyqtyq jeńildikter qarastyrylǵanyn atap ótti.
«Bizde 10 arnaıy ekonomıkalyq aımaq, 20 ındýstrııalyq aımaq qyzmet etýde. Indýstrııalyq aımaqtardy damytý salasynda BAÁ-niń úlken tájirıbesi qyzyqtyryp otyr. Biz aımaqtardy birlesip damytýǵa jáne olardyń keıbirin Ámirlikter kompanııalarynyń basqarýyna berýge daıynbyz»,-dedi Qasymbek.
