Qazaqstan BAÁ-ge astyq, et jáne maıly daqyldar eksportynyń kólemin arttyrmaq

ASTANA. KAZINFORM — Aýyl sharýashylyǵy mınıstri Aıdarbek Saparov Dýbaı qalasyna (BAÁ) jasaǵan jumys sapary aıasynda jáne azyq-túlik ónerkásibi men sýsyndardyń eń iri halyqaralyq Gulfood 2026 kórmesine qatysý barysynda Birikken Arab Ámirlikteriniń Klımattyń ózgerýi jáne qorshaǵan orta mınıstri Amna bınt Abdýlla Ál-Dahak Ál-Shamsımen kezdesti. 

Taraptar agrarlyq saladaǵy strategııalyq yntymaqtastyq máselelerin talqylaı kele, aýyl sharýashylyǵy men azyq-túlik qaýipsizdigi salasyndaǵy ózara is-qımyl ekijaqty qatynastardyń mańyzdy quramdas bóligi ekenin atap ótti.

— BAÁ — Qazaqstannyń Taıaý Shyǵystaǵy negizgi seriktesteriniń biri. 2025 jyldyń 11 aıynyń qorytyndysy boıynsha elimiz ben Ámirlikter arasyndaǵy agroónerkásiptik keshen ónimderiniń taýar aınalymy shamamen 7%-ǵa ósti. Negizgi eksporttyq taýarlar qatarynda qoı eti, iri qara mal eti, burshaq tuqymdas daqyldar, bıdaı jáne basqa da aýyl sharýashylyǵy ónimderi bar. Biz BAÁ-ge eksport kólemin, eń aldymen astyq pen ony qaıta óńdeý ónimderi, maıly daqyldar, ósimdik maılary, et jáne jem-shóp ónimderi, onyń ishinde halal jáne ekologııalyq taza ónimder esebinen odan ári keńeıtýge múddelimiz, — dedi Aıdarbek Saparov.

Sonymen qatar memlekettik jáne kvazımemlekettik qurylymdardyń qatysýymen uzaq merzimdi eksporttyq kelisimsharttar jasasý múmkindigin qarastyrýdy usyndy.

Veterınarııalyq talaptardy kelisý jumystary jalǵasýda.

Búgingi tańda Qazaqstannyń 13 kásiporny BAÁ-ge et pen qus etin eksporttaýǵa ruqsat aldy. Sondaı-aq tiri iri jáne usaq maldy, et pen taýyq jumyrtqasyn jetkizýge kelisim jasaldy.

Qazaqstan Eýrazııa óńirindegi iri agrarlyq óndirýshilerdiń biri sanalady. Bizdiń elimiz álemdegi astyq eksporttaýshy alǵashqy ondyqqa kiredi, un eksporty boıynsha álemde 2-oryndy (1,7 mln tonna) jáne kúnbaǵys maıy eksporty boıynsha 8-oryndy (600 myń tonna) ıelenedi. Astyq eksportynyń jyl saıynǵy kólemi 13–14 mln tonnany quraıdy.

— Osyǵan baılanysty biz BAÁ-niń 2051 jylǵa deıingi Azyq-túlik qaýipsizdiginiń ulttyq strategııasyn iske asyrý sheńberinde uzaq merzimdi seriktes bolýǵa daıynbyz. Ózara is-qımyldy júıeli damytý maqsatynda 2026–2028 jyldarǵa arnalǵan aýyl sharýashylyǵy ónimderin ózara tıimdi jetkizýdi jáne ınvestıtsııalyq yntymaqtastyqty keńeıtý jónindegi Jol kartasy ázirlendi. Bul qujatqa qol qoıý ekijaqty baılanystardy nyǵaıtýǵa jańa múmkindikter ashady, — dep atap ótti Aıdarbek Saparov.

Óz kezeginde Amna bınt Abdýlla Ál-Dahak Ál-Shamsı:

— Qazaqstan — agrarlyq saladaǵy bolashaǵy zor seriktes. Biz sizderdiń agroónerkásiptik keshenderińizdiń áleýetin jáne óndiriletin ónimderdiń sapasyn joǵary baǵalaımyz. BAÁ azyq-túlik qaýipsizdigi salasynda yntymaqtastyqty tereńdetýge, birlesken jobalardy iske asyrýǵa jáne praktıkalyq úılestirý úshin jumys tobyn qurýǵa daıyn, — dedi. 

Aıta ketelik 30 qazaqstandyq kompanııa Gulfood 2026 halyqaralyq kórmesinde óz ónimderin usynǵan edi.