Qazaqstan BAÁ ekonomıkasyna 900 mln. AQSh dollaryn ınvestıtsııalady

ASTANA. QazAqparat -Qazaqstan men Birikken Arab Ámirlikteri arasyndaǵy saýda-ekonomıkalyq qatynastardy damytýdyń áleýeti joǵary. Bul týraly búgin Qazaqstan-BAÁ bıznes-forýmynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

«Birikken Arab Ámirlikteri Qazaqstan úshin Taıaý Shyǵystaǵy eń negizgi áriptesterdiń biri bolyp otyr. Bizdiń qatynastar dostyq pen ózara senimge negizdelgen. Búginde biz ekijaqty saýda-ekonomıkalyq baılanystardyń damýynyń ońtaıly qarqynyn baıqap otyrmyz. Elimizben taýar aınalymy kólemi boıynsha BAÁ tarapy Taıaý Shyǵys elderi arasynda birinshi orynda tur»,-dedi Qasymbek.

Onyń atap ótýinshe, 2015 jylmen salystyrǵanda, 2016 jyly taýar aınalymy kólemi eki el arasynda úsh esege artqan.

«Táýelsizdik alǵannan bergi ýaqytta BAÁ tarapynan Qazaqstanǵa salynǵan tikeleı ınvestıtsııa kólemi 2 mlrd. AQSh dollaryna jetti. Sonymen qatar Qazaqstan BAÁ ekonomıkasyna 900 mıllıonnan astam AQSh dollaryn ınvestıtsııalady. Búginde Ámirlikter bıznesiniń qatysýymen elimizde birlesken 200-ge tarta kásiporyn jumys isteýde»,-dep naqtylady mınıstr.

Osy oraıda ol aýyl sharýashylyǵynda, energetıkada, taý-ken salasynda birlesken jobalar iske asyrylyp jatqanyn eske salyp ótti.
«Degenmen de saýda-ekonomıkalyq qatynastardy damytý úshin bizdiń áleýetimiz áldeqaıda joǵary»,-dep atap ótti Qasymbek.

Bıznes-forýmǵa Birikken Arab Ámirlikteriniń 60-qa jýyq kompanııalarynyń ókilderi jáne Qazaqstannyń 250-den astam kásipkerleri qatysýda.