«Qazaqstan – BAÁ» bıznes-forýmynda birqatar kelisimge qol qoıyldy
ASTANA. KAZINFORM – Memleket basshysy Qasym-Jomart Toqaev pen Abý Dabıdiń Taq murageri sheıh Haled ben Muhammed ben Zaıd Ál Nahaıan «Qazaqstan – BAÁ» bıznes-forýmynyń jabylý saltanatyna qatysty. Bul týraly Aqordanyń baspasóz qyzmeti habarlady.
Qol qoıylǵan kommertsııalyq qujattardyń jalpy somasy 5 mlrd dollarǵa jýyq. Bul ekonomıkanyń negizgi sektorlaryn qamtıdy. Qazaqstanǵa 4,3 mlrd dollardan astam ınvestıtsııa quıǵan BAÁ – elimizdiń Shyǵanaq aımaǵyndaǵy jetekshi saýda jáne ınvestıtsııalyq seriktesi.
– Energetıka, logıstıka, qarjy, ıntellektýaldy tehnologııalar, aýyl sharýashylyǵy jáne taǵy da basqa túrli salada yntymaqtastyǵymyzdy keńeıtýge múmkindik mol. Masdar, Presight, Abu Dhabi Ports, Terminal Holdings jáne Abu Dhabi Commercial Bank cekildi seriktesterimizben birge júzege asyryp jatqan mańyzdy jobalar ózara yqpaldastyqtyń qarqyn ala túskenine aıqyn dálel. Osy jáne basqa da bastamalar ekijaqty qarym-qatynastyń dáıekti ári tıimdi damyp kele jatqanyn kórsetedi, - dedi Prezıdent.
Bıznes forým aıasynda tsıfrlyq tehnologııa damýyna, qarjy, ýrbanıstıka jáne «jasyl» ekonomıka salalaryndaǵy zamanaýı trendterge arnalǵan taqyryptyq sessııalar uıymdastyryldy.
Eki eldiń bıznes ókilderi B2B formatynda kezdesýler ótkizdi.
Forýmǵa Ámirlikterden Abý Dabı Ekonomıkalyq damý departamentiniń, BAÁ saýda-ónerkásip palatalarynyń, sondaı-aq Masdar, AMEA Power, Abu Dhabi Ports Group jáne taǵy da basqa iri kompanııalardyń ókilderi qatysty.
«Qazaqstan – BAÁ» bıznes-forýmynda mynadaı kommertsııalyq kelisimderge qol qoıyldy:
1. Qazaqstan Respýblıkasy Aýyl sharýashylyǵy mınıstrligi men QazaqArab Sugar JShS arasynda Qazaqstanda qant zaýytynyń qurylysy jobasy boıynsha ınvestıtsııalar jónindegi kelisim;
2. Qazaqstan Respýblıkasy Tsıfrlyq damý, ınnovatsııalar jáne aeroǵarysh ónerkásibi mınıstrligi, Astana qalasy ákimdigi men Presight kompanııasy arasynda málimetterdi óńdeý ortalyǵynyń qurylysy boıynsha memorandým;
3. Astana qalasy Bilim basqarmasy men Emirates Kazakhstan Education Investment Group arasyndaǵy yntymaqtastyq týraly memorandým;
4. «Astana» Halyqaralyq qarjy ortalyǵy men Abu Dhabi Global Market arasynda málimetterdi qorǵaý salasyndaǵy yntymaqtastyq jónindegi memorandým;
5. «QMG Injırıng» JShS men AIQ arasynda bilim almasý jáne AIQ sheshimderin ázirleýge arnalǵan strategııalyq yntymaqtastyq jónindegi kelisim;
6. «Atameken» UKP Qazaqstannyń syrtqy saýda palatasy men Khalifa Economic Zones Abu Dhabi arasyndaǵy yntymaqtastyq týraly memorandým;
7. Semurg Invest JShS men Abu Dhabi Ports Group arasynda «Quryq» kópmaqsatty termınalynyń qurylysy jáne ony damytý qaǵıdattary jónindegi kelisim;
8. «Aqtaý teńiz porty» Arnaıy ekonomıkalyq aımaǵy AQ men Khalifa Economic Zones Abu Dhabi arasyndaǵy yntymaqtastyq týraly memorandým;
9. «Alel Agro» AQ men LULU Group arasynda agro azyq-túlik ónimderiniń saýdasyn ilgeriletý jáne satyp alý salasyndaǵy ózara túsinistik týraly memorandým.
Aıta keteıik, Memleket basshysy Abý Dabıdiń Taq murageri Haled ben Muhammed Ál Nahaıanmen kelissóz júrgizdi.
Qazaqstan Prezıdenti men Abý Dabıdiń Taq murageri sheıh Halıf ben Zaıd Ál Nahaıan atyndaǵy №84 mektep-lıtseıge bardy.
Qasym-Jomart Toqaev pen sheıh Haled ben Muhammed ben Zaıd Ál Nahaıan «Astana» halyqaralyq qarjy ortalyǵynda boldy.