Qazaqstan azyq-túlik tapshylyǵymen kúres jónindegi is-qımyldaryn kúsheıtedi
ASTANA. QazAqparat - Senattyń jalpy otyrysynda «QR Úkimeti men BUU-nyń Azyq-túlik jáne aýyl sharýashylyǵy uıymy (FAO) arasyndaǵy FAO-nyń Qazaqstandaǵy Baılanys jáne áriptestik jónindegi bıýrosyn qurý týraly kelisimdi ratıfıkatsııalaý týraly» Zańyn qabyldady, dep habarlaıdy QazAqparat.
Atap aıtqanda, búginge deıin FAO Qazaqstanda jalpy granttyq qarjylandyrý somasy 65,5 mln dollardy quraıtyn jobalardy júzege asyrdy. Onyń ústine, 2018-2019 jyldary FAO quny 130 mln dollardy quraıtyn taǵy 7 jobany iske asyrýdy josparlap otyr.
«Qazaqstannyń agroónerkásiptik saıasat, ósimdik sharýashylyǵy ónimderin óndirý jáne mal sharýashylyǵyn damytý, jer jáne sý resýrstaryn turaqty basqarý jáne olardy josparlaý, orman jáne balyq sharýashylyǵyn damytý salasyndaǵy áleýetin qurý jáne arttyrý maqsatynda Qazaqstan Úkimeti Baılanys jáne seriktestik bıýrosynyń formatynda FAO ókildigin ashýdy josparlap otyr. Álemde osyndaı Bıýro tek 5 elde bar (Meksıkada, Ázerbaıjanda, Kamerýnda, Ekvatorııalyq Gvıneıada, Kot-d'Ivýarda). Bul rette, keleshekte (1-2 jylda) eger jobalar sátti iske asyrylsa, Bıýrony sýbaımaqtyq bólimshege aınaldyrý múmkindigi bar (qazirgi kezde FAO-nyń Ortalyq Azııa elderine arnalǵan sýbóńirlik bólimshesi Ankarada, Túrkııada ornalasqan)», - dep atap ótti QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev.
Bul Bıýro ýákiletti memlekettik organdardyń jaqyndyǵyn eskerip, agroónerkásiptik keshen salasynda kúndelikti tyǵyz jumys júrgizý úshin Astana qalasynda ornalasatyn bolady. Sondaı-aq BUU uıymdarynyń habyn qurý jónindegi Memleket basshysynyń tapsyrmasy aıasynda keleshekte Almaty qalasynda fılıalyn ashý josparlanǵan. Bıýronyń jalpy shtattyq birligi elde iske asyrylyp jatqan jobalar sanyna baılanysty 20 qyzmetkerdi quraıdy, onyń ishinde jergilikti sarapshylar men sheteldik mamandar, tehnıkalyq personal bolady.
Bıýronyń basshysyn FAO Úkimetpen kelise otyryp taǵaıyndaıdy jáne ol halyqaralyq negizde tańdalady. Basshynyń ýákiletti orynbasary Qazaqstan rezıdenti bolady.
Úkimettiń Bıýroǵa qosatyn úlesi - tegin beriletin tıisti keńse, keńselik jabdyq jáne operatsııalyq shyǵyndarǵa arnalǵan 300 myń dollar kólemindegi jyldyq jarna. Bul shyǵyndar Aýyl sharýashylyǵy mınıstrliginiń jáne Syrtqy ister mınıstrliginiń 2019-2021 jyldarǵa arnalǵan bıýdjettik óiniminde eskeriledi.
Qazaqstandaǵy Bıýronyń ashylýynan kútiletin artyqshylyqtarǵa toqtalǵan mınıstr, saıası turǵyda aýyl sharýashylyǵynda jáne azyq-túlik óndirisinde joǵary áleýeti bar memleket retinde Qazaqstannyń bedeli artatynyn, azyq-túlik qaýipsizdigin qamtamasyz etýdiń basym baǵyttary boıynsha jahandyq dıalogtarǵa belsendi qatysý múmkindigi joǵarylaıtynyn atap ótti.
Budan bólek, áleýmettik-ekonomıkalyq artyqshylyqtar aıasynda agroónerkásiptik keshendi damytý, jer jáne sý resýrstaryn turaqty basqarý, josparlaý, orman jáne balyq sharýashylyǵyn damytý salasyndaǵy Qazaqstannyń áleýetin arttyrýǵa yqpalyn tıgizedi.
Jalpy FAO týraly aıtar bolsaq, uıym - ashtyqqa qarsy kúres jónindegi halyqaralyq áreketterdi basqaratyn Birikken Ulttar Uıymy júıesiniń agenttigi. FAO shtab-páteri Rımde (Italııa) ornalasqan. Shyǵys Eýropa, Ortalyq Azııa jáne TMD aımaǵy FAO-nyń Býdapeshttegi aımaqtyq keńsesinen basqarylady. Qazaqstanmen áriptestigi 1997 jyly FAO-ǵa múshe bolǵannan beri damyp keledi.
