Qazaqstan Azııany biriktiretin mýzykalyq alańǵa aınalady
ASTANA. KAZINFORM – Aldaǵy qarasha aıynda Qazaqstannyń elordasy Astanada Azııa memleketteri arasynda alǵash ret «Silk Way Star» atty halyqaralyq mýzykalyq baıqaý ótedi.
Aýqymdy jobanyń aıasynda Azııanyń 12 elinen talantty oryndaýshylar baq synaıdy. Bul týraly «Jibek Joly» telearnasyndaǵy «Búgin LIVE» baǵdarlamasynda jobanyń atqarýshy prodıýseri Muqaǵalı Qýatuly men shef-redaktory Qasymhan Aldashev málimdedi.
Baıqaý Qazaqstan Prezıdentiniń Teleradıokesheni men Qytaıdyń CMG medıakorporatsııasy arasyndaǵy yntymaqtastyq aıasynda uıymdastyrylady. Joba Qytaıdyń ortalyq telearnalarynda 105 mınýttan turatyn 10 epızod túrinde kórsetilmek.
– Jobany Astanada ótkizýimizdiń basty sebebi – elordany sheteldik qatysýshylarǵa kórsetý. Qatysýshylar 12 elden irikteldi. Іrikteý protsesi sol memleketterdegi Qazaqstan elshilikteri jáne sol elderdiń mádenıet basqarmalary arqyly júrgizildi. Jalpy sany 80-ge jýyq ótinim kelip tústi. Sonyń ishinen óz óńirlerinde belgili beleske jetken ánshiler tańdap alyndy. Іs-shara tek vokaldyq sheberlikti ǵana emes, sahnalyq óner men artıstızmdi qajet etetin baıqaý. Osyny eskere otyryp, Qazaqstan atynan Alem laqap atymen tanylǵan Batyrhan Málikti tańdadyq. Ol – sońǵy jyldary el ishinde jarqyraı tanylǵan daryndy oryndaýshy, – dedi Muqaǵalı Qýatuly.
Jobanyń basty ereksheligi – bul qarapaıym án baıqaýy emes, mádenı almasý alańy. Munda túrli eksperımentter júzege asyrylady. Máselen, shetelden kelgen oryndaýshylar qazaqtyń tanymal ánderin óz tilderinde shyrqaıdy. Sonymen qatar, qazaqtyń halyq ánderi men halyq kompozıtorlarynyń shyǵarmalaryn oryndaıdy. Jobanyń taǵy bir mańyzdy tusy – sheteldik ánshiler men qazaqstandyq juldyzdardyń dýetteri, bul óz kezeginde halyqtar arasyndaǵy mádenı kópirge aınalmaq dep atap ótti jobanyń shef-redaktory Qasymhan Aldashev.
– Ár elden bir-birden, jalpy 12 qazylar alqasy jumys isteıdi. Olar óz memleketterinde tanymal ánshiler, prodıýserler jáne mádenıet salasyna eńbegi sińgen mamandar, – Qasymhan Aldashev.
Buǵan deıin, Astanada QR Prezıdentiniń Teleradıokesheni men Qytaı Medıa korporatsııasy (CMG) «Silk Way Star» halyqaralyq jobasy týraly kelisimge qol qoıǵanyn jazǵanbyz.