Qazaqstan Azııa Para oıyndarynda jańa sport túrinen alǵash ret jarysqa shyǵady
ASTANA. KAZINFORM — 18-24 qazan aralyǵynda Japonııanyń Aıchı prefektýrasy men Nagoıa qalasynda tirek-qımyl apparaty, kórý qabileti zaqymdanǵan jáne zııatkerlik damý erekshelikteri bar sportshylar arasynda V Azııa Para oıyndary ótedi.
Baıraqty básekede Qazaqstan ulttyq komandasynyń sapyndaǵy 150 sportshy sporttyń 12 túri boıynsha óner kórsetedi.
Atap aıtqanda, voleıboldy otyryp oınaýdan — 12, para taekvondodan — segiz, para dzıýdodan — 26, para ústel tennısinen — 12, para oq atýdan — 12, para jeńil atletıkadan — 14, para sadaq atýdan — toǵyz, para júzýden — 21, arbadaǵy tennısten — úsh, para paýerlıftıngten — 15, bochchadan — bes jáne para velosporttan — 13 sportshy qatysady.
— Azııa Para oıyndarynda Qazaqstan ulttyq quramasynyń sportshylary 1 komandalyq jáne 11 jekeleı sport túrinen el namysyn qorǵaıdy. Bıylǵy oıyndarda Qazaqstan quramasy arbadaǵy tennısten alǵash ret baq synaıdy. Sonymen qatar para jeńil atletıkadan zııatkerlik damý erekshelikteri bar sportshylar da tuńǵysh ret el namysyn qorǵaıdy. Atap aıtqanda, olar jeńil atletıkadan T20 jáne para ústel tennısinen 11-synypta jarys jolyna shyǵady. Oıyndar aldyndaǵy daıyndyq barysynda sportshylarymyz 23 oqý-jattyǵý jıynynan ótip, 22 halyqaralyq týrnırge qatysyp, 63 medal jeńip aldy. Aldaǵy jarystarda da sportshylarymyz óz sheberlikterin barynsha kórsetip, laıyqty nátıjelerge qol jetkizedi dep senemiz, — dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń Sport boıynsha basqarmasynyń basshysy Qaıratbek Seıitbekov.
Qazaqstandyq para sportshylar úshin V Azııa Para oıyndarynyń alǵashqy jarystary 16 qazanda para ústel tennısinen jekeleı oıyn túrinen bastalady. Al jarystyń resmı ashylý saltanaty 18 qazanda Nagoıa qalasynyń Mıdzýho jeńil atletıka stadıonynda ótedi.
Aıta keteıik, V Azııa Para oıyndaryna 45 elden 4 000-ǵa jýyq sportshy qatysyp, sporttyń 18 túrinen 502 medal jıyntyǵy sarapqa salynady.
Qazaqstan Azııa Para oıyndarynda 2010 jyldan beri qatysyp, jalpy 105 medaldi jeńip aldy. Onyń ishinde 20 altyn, 35 kúmis jáne 50 qola medal bar.
2010 jyly 63 sportshymen alty sport túrinen qatysyp, eki kúmis jáne bes qola medal jeńip aldy. 2014 jyly Inchhon qalasynda (Ońtústik Koreıa) 78 sportshy toǵyz sport túrinen qatysyp, 24 medal (jeti altyn, alty kúmis jáne 11 qola) enshiledi.
2018 jyly Djakartada (Indonezııa) ótken III Azııa Para oıyndarynda elimizdiń 90 sportshysy toǵyz sport túrinen baq synap, 33 medal (bes altyn, 15 kúmis, 13 qola) jeńip aldy. Hanchjoý qalasynda ótken sońǵy Azııa Para oıyndarynda 131 sportshy qatysyp, rekordttyq 41 medaldi (segiz altyn, 12, 21 qola) enshiledi.
Eske salaıyq, Japonııada XX jazǵy Azııa oıyndary aıaqtaldy. Qazaqstan quramasy 84 medal oljalap, 46 eldiń ishinde jalpykomandalyq esepte segizinshi orynǵa turaqtady.
