Qazaqstan Azııa oıyndaryndaǵy 40-shy júldesine qol jetkizdi

Qazaqstandyq velosportshy Rınata Sultanova Hanchjoýda ótip jatqan Azııa oıyndarynyń qola júldegeri atandy, dep habarlaıdy QazAqparat agenttigi Sports.kz portalyna silteme jasap.

Ol tasjoldaǵy jarystyń jekeleı synyna qatysyp, máre syzyǵyn úshinshi (+1:00.11) bolyp kesti. Ózbekstan ókili Olga Zabelınskaıa (24:35.99) men japonııalyq Erı Enamıne (+59.60) birinshi jáne ekinshi oryndy ózara bólisti. Jarys jolyna 14 sportshy shyqqan bolatyn.

Bul medal Qazaqstan quramasynyń osy Azııa oıyndaryndaǵy 40-shy júldesi jáne 29-shy «qolasy» bolyp tur. Sondaı-aq ulttyq qurama qorjynynda tórt altyn, jeti kúmis medal bar. Hanchjoýdaǵy Azııa oıyndary 8 qazanǵa deıin jalǵasady.