Qazaqstan Azııa oıyndaryn qabyldaýy múmkin be
ASTANA.KAZINFORM — Qazaqstan Ulttyq Olımpıadalyq komıtetiniń bas dırektory Nurlan Nógerbek Kazinform tilshisine elimizde kezekti Azııa oıyndaryn ótkizý múmkindigi týraly aıtty.
Nurlan Nógerbektiń aıtýynsha, elimizdiń qysqy Azııa oıyndaryn ótkizýge áleýeti joǵary.
— 2011 jyly biz VII Aq Azııadany sátti qabyldadyq. Qazirgi ýaqytta Saýd Arabııasynda kezekti qysqy Azııa oıyndaryn ótkizýde qıyndyqtar týyndap otyr. Sol sebepti biz Týrızm jáne sport mınıstirligimen osy másele tóńireginde jumys isteýimiz kerek dep oılaımyn, — dedi UOK bas dırektory Astana qalasynda ótken 20-shy jazǵy Azııa oıyndaryna arnalǵan baspasóz konferentsııasynda.
Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Nurlan Esembaev aldaǵy jyldary elimizde halyqaralyq iri jarystar ótetinin eske saldy.
— Aldaǵy jyldary elimizde 20 shaqty iri halyqaralyq sport jarysyn ótkizý josparlanǵan. Al jyl sońyna deıin 7 halyqaralyq jarysyn ótkizemiz. 2026-2028 jyldar aralyǵynda, Qazaqstanda ústel tennısi, aýyr atletıka jáne taekvondo sııaqty sport túrlerinen álem chempıonatyn qabyldaımyz. Meniń oıymsha, bundaı is-sharalar bizge jaqsy tájirıbe jınaýǵa jáne ınfraqurylymdy damytýǵa múmkindik beredi, — dedi mınıstrlik ókili.
Aıta keterligi, 2026 jyldyń 19 qyrkúıek pen 4 qazan aralyǵynda Japonııanyń Aıchı prefektýrasy men Nagoıa qalasynda XX jazǵy Azııa oıyndary ótedi. Jarys uıymdastyrýshylary — Azııa Olımpıadalyq keńesi (AOK) jáne Azıada uıymdastyrý komıteti AINAGOC. Oıyndardyń urany — Imagine One Asia («Birtutas Azııany elestet»).
Osyǵan deıin habarlaǵanymyzdaı, Astanada Azııa Olımpıadalyq keńesi (AOK) uıymdastyrǵan VI Qurlyqtyq sportshylar forýmy bastaldy.