Qazaqstan Azııa men Eýropany jalǵaıtyn negizgi logıstıka ortalyǵy bolmaq — Memleket basshysy
ASTANA. KAZINFORM — Qasym-Jomart Toqaev kólik-logıstıka salasy elimizdiń uzaqmerzimdi damý strategııasyndaǵy mańyzdy baǵyttardyń biri ekenin Sheteldik ınvestorlar keńesiniń 38-shi plenarlyq otyrysynda aıtty.
— Biz Qazaqstandy Azııa men Eýropany jalǵaıtyn aımaqtaǵy jetekshi logıstıka torabyna aınaldyrýdy kózdeımiz. Elimizdiń aýmaǵy arqyly 13 iri halyqaralyq kólik dálizi ótedi. Bul Qazaqstannyń qurlyqaralyq tasymal tizbegindegi yqpaly zor ekenin kórsetedi. Qytaı men Eýropa arasyndaǵy temir jolmen tasymaldanatyn júk kóleminiń 85 paıyzǵa jýyǵy Qazaqstan aýmaǵymen ótedi. Munyń ózi álemdik saýda men ózara kólik baılanysynda negizgi ról atqaratynymyzdy rastaıdy. Osy pozıtsııany odan ári ornyqtyra túsý úshin kólik ınfraqurylymyna, myńdaǵan shaqyrym jańa temirjol salýǵa, sondaı-aq Orta dáliz retinde keńinen tanymal Transkaspıı halyqaralyq kólik baǵytyn ary qaraı damytýǵa qomaqty ınvestıtsııa quıyp jatyrmyz. Sońǵy on bes jylda Qazaqstan kólik-logıstıka ınfraqurylymyna 35 mıllıard dollardan astam qarjy jumsady. Biz zamanaýı logıstıka sapaly ınfraqurylymdy ǵana emes, ozyq tsıfrlyq sheshimderdi de talap etetinin jaqsy túsinemiz. Sol sebepti búkil ekojúıeni tsıfrlandyrý sharalaryn qolǵa aldyq, — dedi Prezıdent.
Sonymen qatar Memleket basshysy ótken jyldyń sońynan bastap kedendik, logıstıkalyq jáne kommertsııalyq qyzmetter usyný úshin «bir tereze» qaǵıdatymen jumys isteıtin Smart Cargo biryńǵaı tsıfrlyq platformasy engizilip jatqanyn aıtty.
— Platforma negizgi rásimderdiń bárin biryńǵaı tsıfrlyq ortaǵa jınaqtap, ákimshilik kedergiler men tranzıt ýaqytyn aıtarlyqtaı qysqartady. Alǵashqy kezeńniń ózinde Qytaı — Ózbekstan baǵyty boıynsha tranzıttik operatsııalar tolyq tsıfrlandyryldy, al memlekettik shekaradan ótý úderisteri elektrondy formatqa aýystyryldy. Bul halyqaralyq júk tasymalyn jyldamdatyp, ashyqtyqty qamtamasyz etti. Sonyń nátıjesinde Eýrazııa keńistiginde jumys isteıtin halyqaralyq bıznes ókilderi úshin Qazaqstan aýmaǵymen júk tasymaldaý anaǵurlym tıimdi, únemdi ári senimdi bola tústi, — dedi Qasym-Jomart Toqaev.
Aıta keteıik, Qazaqstannyń tsıfrlyq transformatsııasy ınvestıtsııalyq tartymdylyqty arttyrýǵa yqpal etip otyr.
