Qazaqstan Azııa ınfraqurylymdyq ınvestıtsııalar bankiniń quryltaıshy múshesi bolýǵa umtylady - Májilis
ASTANA. QazAqparat - Búgin Májilistiń jalpy otyrysynda «Azııa ınfraqurylymdyq ınvestıtsııalar banki kelisiminiń baptaryn ratıfıkatsııalaý týraly» zań jobasy maquldandy.
Azııa ınfraqurylymdyq ınvestıtsııalar banki týraly kelisim 2015 jyly 29 maýsymda Beıjińde jasalǵan bolatyn. Qazaqstandy qosa alǵanda Banktiń quryltaıshysy elý jeti memleket bolyp tabylady. Onyń ishinde otyz jetisi azııalyq, jıyrmasy óńirlik emes elder bolyp tabylady. Al iri aktsıonerleri - Qytaı, Reseı men Úndistan.
«Banktiń jarǵylyq kapıtaly 100 mlrd AQSh dollaryn quraıdy jáne tólenetin aktsııalardan (20 mlrd) jáne talap etý boıynsha tóleýge jatatyn aktsııalardan (80 mlrd) turady. Bank kapıtalynyń óńirlik músheleriniń úlesi 75 paıyzdy, óńirlik emes músheleriniń úlesi 25 paıyzdy quraıdy. Sol arqyly sheshýshi daýys berý quqyǵy azııalyq elderde qalady. Shtab-páteri Beıjińde ornalasady», - deıdi Ulttyq ekonomıka mınıstri Erbolat Dosaev.
Onyń aıtýynsha, kelisim kúshine engen sátten bastap Qazaqstan Respýblıkasy Banktiń quryltaıshy múshesine aınalady jáne ózine Kelisimde kózdelgen mindettemelerin alady.
Bank kapıtalynyń bólinýine sáıkes, Qazaqstannyń Bank kapıtalyndaǵy jalpy úlesi 729,3 mıllıon AQSh dollaryn nemese 0,7 paıyzdy quraıdy. Tólenetin kapıtal 145,9 mıllıon dollaryn qurap, ol 5 transhpen 29,2 mln. AQSh dollary mólsherinde jyl saıyn tólenetin bolady.
«Tutastaı alǵanda, álemdegi qıyn ekonomıkalyq jaǵdaı aıasynda osy kelisimdi ratıfıkatsııalaý Qazaqstanǵa Bank arqyly ınfraqurylymdyq jobalardy uzaqmerzimdi jáne qolaıly kredıttik resýrstar tartýǵa múmkindik beredi. Bul ekonomıkanyń damýyna jáne Azııadaǵy óńirlik ıntegratsııa deńgeıin arttyrýǵa oń áserin tıgizedi», - dedi Ulttyq ekonomıka mınıstri Erbolat Dosaev.
