Qazaqstan Azııa aýyr atletıka federatsııasyna óziniń qatysýyn keńeıtti
ASTANA. QazAqparat - Katardyń bas shahary - Dohada Azııa aýyr atletıka federatsııasynyń (AWF) kezekti kongressi ótti. Sol jıyn barysynda osy salaǵa qatysty kóptegen keleli máseleler áńgime ózgine aınaldy. Sondaı-aq, aldaǵy jyldardyń jospary jasalyp, baǵyt-baǵdary aıqyndalyp, atalmysh uıymnyń jańa basshylary saılandy, dep habarlady federatsııanyń baspasóz qyzmeti.
Bizder úshin qýanyshty jaıt, Qaırat Turlyhanov Azııa aýyr atletıka federatsııasynyń vıtse-prezıdenti qyzmetine tórt jyl merzimge qaıta saılandy. Kongress barysynda kóptegen memleketten kelgen laýazymdy tulǵalar men maıtalman mamandar jerlesimizdiń osy sport túrine sińirgen eren eńbegin asa joǵary baǵalap, oǵan barynsha kóp daýys berdi.
Qaırat Bolatuly 2001 jyldan beri otandyq aýyr atletıkany órge súırep keldi. Jerlesterimizdiń osy saladaǵy tabystarynyń basym bóligi osy azamattyń esiminen tyǵyz baılanysty. Kezinde turalap qalǵan ónerdiń boıyna qan júgirtip, qazaqstandyq ziltemirshilerdiń halyqaralyq arenada orasan zor tabysqa jetýine súbeli úles qosty. Enver Túrkilerı syndy áıgili mamannyń bizdiń elge kelýine sebepker boldy.
«Turlyhanov myrza respýblıkalyq federatsııanyń tizginin ustaǵan 2001-2013 jyldar aralyǵynda Qazaqstannyń ulttyq quramasy Olımpıada oıyndarynda 5 altyn, 3 kúmis jáne 1 qola medaldi ıelendi. Álem chempıonattarynda 10 altyn, 3 kúmis jáne 2 qolaǵa qol jetkizdi. Qazaqstannyń ziltemirshileri 2008 jyly alaýy tutanǵan Beıjiń Olımpıadasy men 2010 jáne 2011 jyldary ótken dúnıejúzilik dodanyń jalpy komandalyq esebinde úshinshi orynǵa turaqtady. 2012 jyly London Olımpıadasy men 2011 jylǵy álem chempıonatynda ekinshi oryndy oljalady. Azııa oıyndary men qurlyqtyq birinshilikterde atoı salǵan kezderimiz de az emes. Talaı órenimiz rekordtyq kórsetkishke qol jetkizip, el sporty tarıhynda qalýǵa turarlyqtaı is tyndyrdy. Turlyhanov tizgindi ustaǵan tusta qazaq jastary da osy sport túrine kóptep tartyla bastady. Olardyń aldy álemdik dodada jeńis tuǵyryna kóterilip te úlgerdi», - delingen habarlamada.
