«Qazaqstan ázirshe ǵaryshtyq derjava emes» - T.Musabaev
ASTANA. 3 qarasha. QazAqparat /Aıdar Ospanalıev/ - «Qazaqstan ǵaryshtyq memleket emes. Sondyqtan elimizde ara-tura aıtylyp qalatyn «Biz ǵaryshtyq derjavamyz» degen syńaıdaǵy áńgimelerdi taratýǵa eshqandaı negiz joq», dedi búgin Ulttyq ǵarysh agenttiginiń tóraǵasy Talǵat Musabaev BNews.kz portalynda ótken onlaın-konferentsııa barysynda.
Agenttik tóraǵasynyń pikirinshe, Qazaqstan qazir ǵaryshtyq memleket atanýǵa senimdi túrde qadam basyp otyr. «Biz ǵaryshtyq derjavaǵa aınalý úshin barlyq kúsh-jigerimizdi paıdalanyp otyrmyz. Alaıda bizge qazir kúni buryn boldyq, toldyq dep aıtý erte. Biz ǵaryshtyq el atanýymyz úshin bizdiń jeke spýtnıkter toptamamyz bolý qajet. Biz bul baǵytta qazir tıisti josparlar jasap, tipti naqty jumystar atqaryp otyrmyz desek te bolady. Bul baǵyttaǵy jumystardy barynsha jan-jaqty, tereń ári tolyq zerttep-zerdeledik. Qazirgi tańda ǵaryshty damytý boıynsha 2014 jylǵa deıingi aralyqty qamtıtyn baǵdarlama da bekitildi. Oǵan sáıkes jaqyn bolashaqta orbıtaǵa telekommýnıkatsııalyq maqsattardy júzege asyratyn «QazSat» sııaqty jer serigi ushyrylady», - dedi agenttik tóraǵasy.
Onyń sózine qaraǵanda, agenttik ótkenniń kemshilikterinen sabaq ala otyryp, spýtnıkke tapsyrysty halyqaralyq tender negizinde berdi.
«QazSat-3» jer serigin jasaýǵa degen tender qazirdiń ózinde jarııalanyp úlgerdi. Osy ýaqytta tenderge Frantsııa, Germanııa, Japonııa, Reseı, AQSh, Izraıl, Úndistan sııaqty memleketter qatysýda. Bul baǵytta qazir bizge ózimizdiń qajettilikterimizdi qanaǵattandyratyn úzdik degen kompanııany tańdap alý qajet. Árıne biz tapsyrys beretin spýtnıktiń quny da bıýdjetimizge saı bolǵany jón. Óıtkeni álemdegi eń keremet degen spýtnıkke de tapsyrys berýge bolady. Alaıda oǵan da qomaqty qarjy qajet. Bul rette bizdiń «qolymyz baılaýly». Óıtkeni bıýdjetti agenttik emes, úkimet belgileıdi», - dedi agenttik tóraǵasy.
Onyń málimetterinshe, bir jer seriginiń quny shamamen 120 mıllıon dollardyń kóleminde bolady.
