Qazaqstan, Ázirbaıjan, Belarýs memleketteri daǵdarystan sátti shyǵa aldy - Ekonomıka ınstıtýtynyń dırektory
ALMATY. Mamyrdyń 6-sy. QazAqparat /Erlik Erjanuly/ - Daǵdarys kezinde tek iri 2 memleket ǵana óziniń qarqyndy damýyn jalǵastyra aldy. Bul búgin Almatyda "Azııa-Tynyq muhıt aımaǵyndaǵy ekonomıkalyq jáne áleýmettik jaǵdaıǵa sholý: 2010 jyl" dep atalatyn Azııa-Tynyq muhıty aımaǵyndaǵy ekonomıkalyq jáne áleýmettik keńes (ATMEÁK) jarııalanymynyń tanystyrylymynda aıtyldy,
dep habarlaıdy QazAqparat.
"Daǵdarys kezinde damý qarqyny Qytaıda 8,9 paıyz, Úndistanda 6 paıyzdy qurady. Al eń damyǵan elderde ol tómendep ketti. Máselen, Japonııada 6,5 paıyz, Germanııada 6 paıyz boldy. Olar qazir Shyǵysqa kóz tigýde. Árıne, Qytaı ǵajaıybynyń qupııasyn ashý bizge qıyn. Eýropa osy ýaqytqa deıin óz standarttarymen ǵana damyp keldi", deıdi Ekonomıka ınstıtýtynyń dırektory Orazaly Sábden. Ekonomıst- ǵalymnyń aıtýynsha, TMD-da Qazaqstan, Ázirbaıjan, Belarýs memleketteri daǵdarystan sátti shyqty. Qazaqstan úkimeti 2,5 paıyzdyq damýdy josparlap otyr. Alǵashqy toqsannyń qorytyndysyna qaraǵanda, bul júzege asatyn nárse.
