Qazaqstan azyq-túlik qaýipsizdigin nyǵaıtty - saıasattanýshy

ASTANA. KAZINFORM – Jańajyldyq úndeýi barysynda Prezıdent 2025 jyldyń elimiz úshin úlken belesterdiń jyly bolǵanyn aıtty.

Farhad Hasenovtyń aıtýynsha, bul birinshi kezekte turǵyn úı máselesi men azyq-túlik qaýipsizdigin qamtamasyz etýge qatysty bolyp otyr, dep habarlaıdy Kazinfrom menshikti tilshisi.

Sarapshynyń aıtýynsha, Memleket basshysynyń jańajyldyq úndeýi merekelik dástúr ǵana emes, kóp jyldan beri qalyptasqan saıası mádenıettiń mańyzdy elementi. Mundaı qujatta ótken jyldyń qorytyndysy jasalyp, bolashaq damýdyń sheshýshi baǵyttary aıqyndalady, qoǵamnyń emotsııalyq keskin-kelbeti qalyptasady. Kóptegen qazaqstandyqtar úshin bul elde bolyp jatqan jaǵdaılardy, memlekettiń jyldy qalaı atqarǵanynyń jáne aldyǵa qandaı maqsat qoıyp otyrǵanynyń kórsetkishi.

— Prezıdent óz úndeýinde 2025 jyl Qazaqstan úshin iri jetistikterge toly bolǵanyn atap ótti. Infraqurylym salasynda aýqymdy jobalar júzege asty. Temirjoldar men avtokólik joldarynyń salynýy - aýmaǵy keń, óńirler arasyndaǵy baılanys el birliginiń ózegi sanalatyn memleket úshin strategııalyq mańyzy zor qadam. Sonymen qatar áleýmettik bastamalarǵa da erekshe mán berildi, 100 jańa mektep boı kóterdi. Eger buryn mundaı kórsetkishter arnaıy memlekettik baǵdarlamalardyń («100 mektep, 100 aýrýhana») aıasynda júzege assa, búginde bul áleýmettik ınfraqurylymdy jyl saıyn júıeli túrde jańartýdyń qalypty tájirıbesine aınaldy. Bul demografııalyq ósim men jastar sanynyń artýy jaǵdaıynda aıryqsha mańyzdy, — deıdi Farhad Qasenov.

Sarapshy turǵyn úı máselesin sheshý men azyq-túlik qaýipsizdigin nyǵaıtý baǵytyndaǵy tabystardy da erekshe atap ótedi. Qazaqstan ekinshi jyl qatarynan mol astyq jınap otyr. Bul — aýyl sharýashylyǵyna jańa tehnologııalardy engizý men iri ınvestıtsııalardyń nátıjesi.

— Damyǵan agrarlyq óndiris — eldiń turaqtylyǵy men ornyqtylyǵynyń kepili. Ol halyqty sapaly azyq-túlikpen qamtamasyz etip qana qoımaı, eksporttyq áleýetti de qalyptastyrady. Memleket basshysy atap ótkendeı, astyq áli de álemdik deńgeıde ekonomıkalyq saıasat júrgizýge múmkindik beretin mańyzdy «valıýta» bolyp qala beredi. 2025 jyly Qazaqstan ekonomıkasynyń ósimi 6 paıyzdy qurady. Bul — jahandyq turaqsyzdyq jaǵdaıynda aıryqsha kórsetkish. Álemdegi saıası jáne ekonomıkalyq qubylmalylyq aıasynda Qazaqstan óz turaqtylyǵyn saqtap otyr, — deıdi Farhad Qasenov.

Prezıdent 2026 jyldy tsıfrlandyrý men jasandy ıntellekt jyly dep jarııalady. Bul sheshim — jahandyq syn-qaterlerdi tereń túsinýdiń ári eldi tehnologııalyq ózgeristerdiń aldyńǵy shebinde ustaýǵa degen umtylystyń kórinisi.

— Alaıda tsıfrlandyrý damyǵan bilim men aqparattyq ınfraqurylymsyz múmkin emes. Sondyqtan árbir qazaqstandyq úıdi joǵary jyldamdyqtaǵy ınternetpen, turaqty elektr qýatymen qamtamasyz etýge jáne bilikti kadr daıarlaýǵa basymdyq berip otyr. Bilim, ǵylym jáne densaýlyq saqtaý salalaryn júıeli qoldaý da erekshe aıtyldy. Muǵalimderdiń joǵary jalaqysy, jastarǵa salynǵan ınvestıtsııa, ǵylymdy damytý — eldiń tsıfrlyq bolashaǵynyń berik irgetasy, — dep esepteıdi saıasattanýshy.

Farhad Qasenovtiń pikirinshe, ishki saıasattyń eńbekqorlyq, adaldyq pen jasampaz eńbekke negizdelgen jańa tujyrymdamasy da nazar aýdarýǵa laıyq.

— Jańa jyldyq úndeý is júzinde Qazaqstan halqyna arnalǵan Joldaýdyń negizgi tezısterin yqsham túrde qamtydy. Onda áleýmettik-ekonomıkalyq basymdyqtarmen qatar, aldaǵy saıası ózgerister men reformalar, sonyń ishinde konstıtýtsııalyq jańǵyrý da aıqyn kórinis tapty. Sonymen birge Memleket basshysy jahandyq qatynastar qaıta qalyptasyp jatqan kúrdeli halyqaralyq ahýalǵa nazar aýdardy. Qazaqstan syrtqy jáne ishki saıasatta eleýli syn-qaterlerge tap bolyp otyr, alaıda bul kezeń jańa múmkindikterge de jol ashady, — deıdi sarapshy.

Osyǵan deıin astyq eksporttaýshylar jańa ónimin erte jóneltse, 2026 jyly sýbsıdııa alatyny týraly jazdyq.