Qazaqstan Azıadanyń altynshy jarys kúninde bes qola medal jeńip aldy

Júldelerdiń birin jeńil atlet Alına Chıstıakova jeńip aldy. Ol jetisaıystyń jeti saıysy boıynsha 5568 upaı jınap, úshinshi orynǵa turaqtady. Japonııalyq ıÝrı Tanaka chempıon atansa, onyń otandasy Nanaka Kadzıkı kúmis júldege ıe boldy.

Jeńil atletıkadan taǵy bir qola júldeni Polına Ivanova ıelendi. Syryqpen sekirý fınalynda qazaqstandyq sportshy 4,15 metr bıiktikti baǵyndyryp, úndistandyq Baranıka Elangovanmen birge úshinshi oryndy bólisti. Anna Cherkashına 4 metr nátıjemen jetinshi oryn aldy.

– Altynshy jarys kúninde Qazaqstan quramasy bes qola medal jeńip aldy. Osylaısha alty kúnniń qorytyndysy boıynsha ulttyq quramanyń júlde sany 30-ǵa jetti, – dep málimdedi Ulttyq Olımpıada komıteti.

Nysana kózdeýden Islam Sátpaev júldeger atandy. Ol 50 metr qashyqtyqtan úsh qalypta myltyqpen atý saıysynyń fınalyna shyǵyp, 348,3 upaımen qola medal ıelendi. Іrikteý kezeńinde Sátpaev 584 upaı jınaǵan. Konstantın Malınovskıı 13-oryn, Nıkıta Shahtorın 20-oryn aldy. Komandalyq esepte Qazaqstan besinshi boldy.

Semserlesýden Qazaqstan áıelder quramasy da qola júldege qol jetkizdi. Shpagamen semserlesýdiń shırek fınalynda Sofııa Nıkolaıchýk, Irına Bakaldına, Darıa Samodelkına jáne Vladıslava Andreeva Gonkong quramasyn 45:35 esebimen jeńdi. Jartylaı fınalda Qazaqstan Qytaıdan 21:45 esebimen jeńilip, komandalyq jarysty úshinshi orynmen aıaqtady.

Baıdarka men kanoede esýden de Qazaqstan qorjynyna qola medal tústi. Olga Shmeleva, Stella Sýhanova, Tatıana Tokarnıtskaıa jáne Evelına Kostenko 500 metrge baıdarka-tórttik jarysynda úshinshi oryn aldy. Qazaqstandyq ekıpajdyń nátıjesi – 1:37.005. Qytaı quramasy jeńimpaz atansa, Ózbekstan ekinshi orynǵa ıe boldy.

Alty jarys kúninen keıin Qazaqstan quramasynyń qorjynynda 30 medal bar. Onyń segizi – altyn, segizi – kúmis, 14-i – qola. Jalpykomandalyq esepte Qazaqstan tórtinshi orynda tur.