Qazaqstan Azıadada nelikten úzdik bestikke kire almady - Arystanbek Muhamedıuly
Eske sala ketsek, Azııa oıyndarynda Qazaqstan quramasy 15 altyn, 17 kúmis jáne 44 qola medal alyp (barlyq medaldar sany - 76), jalpy reıtıngte toǵyzynshy orynnan kóringen bolatyn. Arystanbek Muhamedıuly osy oıynda el namysy úshin baryn salǵan sportshylarǵa alǵysyn bildirdi.
«Ókinishke qaraı, keıbir obektıvti jáne sýbektıvti sebepter bizdiń quramamyzǵa jalpy esepte joǵary oryndardan kórinýge múmkindik bermedi», - dep bastady Feısbýktegi jazbasyn mınıstr.
Mınıstrdiń jazýynsha, eń birinshiden Qazaqstannyń aýyr atletteri bul jarysqa qatysqan jaǵdaıda kem degende 4 medal ákeler edi. Naqtyraq aıtqanda, úkilegen úmitti arqalap otyrǵan Zúlfııa Chınshanlo men Jazıra Japarqul, Nıdjat Rahımov pen Denıs Ulanov atalmysh jarystan bos qaıtpaıtyny anyq edi. Aýyr atletterimizdi 2008 jáne 2012 jylǵy dopıng daýlaryna baılanysty jarys jolyna shyǵarmaı qoıǵan. Shettetý merzimi osy jyldyń qazan aıynyń 19-da aıaqtalatynyn aıta ketý kerek.
Qazaqstandyq boksshylar bıyl eki kúmis medalge ıe boldy. Arystanbek Muhamedıulynyń aıtýynsha, boks quramasynda jańartý júrgizilip jatyr. Kóptegen tabysty sportshylardyń kásipqoı boksqa aýysyp ketip jatqany da óz áserin tıgizýde. Atap aıtqanda, Danııar Eleýsinov, Ivan Dychko, Álı Ahmedov, Jańqosh Turarov, Meıirim Nursultanovtar qazir áýesqoı bokspen qoshtasqan.
«Men bizdiń sportshylar úshin qýanamyn. Onyń ústine, Azıadada bokstan 91 kelige deıin, 91 keli jáne 91+ keli salmaqtardy alyp tastady. Ondaǵy Vasılıı Levıt, Anton Pınchýk sekildi myqty boksshylar avtomatty túrde Azıadanyń syrtynda qaldy», - deıdi mınıstr.
«Karateden de bir salmaqtyń, oqtyq jáne stendtik atý saıystarynyń komandalyq túrleri alynyp tastalǵany da óz áserin tıgizdi» dep esepteıdi Arystanbek Muhamedıuly. Budan burynǵy Azııa oıyndarynda Qazaqstan atalǵan sport túrlerinen altyn medal alǵan bolatyn.
«Buǵan qosa, Azıadaǵa dástúrli ózbek kúresi - kýrash qosyldy. Osy sport túri ózbek sportshylaryna 5 altyn medal ákeldi. Dástúrli ındonezııalyq jekpe-jek túri penchak-sılat, djetskaı (gıdrotsıkldegi jarys), sporttyq brıdj, sepaktaktraý (voleıbol, fýtbol, tipti gımnastıkanyń qosyndysy) Azııa oıyndaryna enip ketti», - deıdi ol.
Mınıstr bıyl ulttyq quramaǵa myqty tennısshilerimiz Mıhaıl Kýkýshkın, ıÝlııa Pýtıntseva, Zarına Dıas kómektese almaı, budan da salmaqty komandalar arasyndaǵy US Open saıysyna AQSh-qa attanyp ketkenin tilge tıek etti.
«Medaldardyń jalpy sany boıynsha biz shynynda da jalpy esepte besinshi orynda turmyz. Joǵaryda atalǵan jaılardyń bári altyn medalge qol jetkizýge kedergi keltirdi. Álbette, jaǵdaı aqtalýdy kótermeýi múmkin, biraq tereńirek taldasaq, bylaı bolýy múmkin edi: eger 15 altyn medalge - aýyr atletterimizdiń 4 altyn medalin qossaq, altyn medalderimizdiń sany 19-ǵa jeter edi. Al eger oǵan bokstaǵy alýymyz ábden múmkin taǵy 3 altyndy qossaq - 22 altyn medalge qol jetkizer edik. Tennısshilerimiz de úsh altyn medal alyp berýge ábden qaýqarly-tyn. Oǵan Eldos Smetovtyń jaraqatyna baılanysty ala almaı qalǵan bir altynyn qossaq - jalpy 26 altyn medalimiz bolar edi», - dep túıdi Arystanbek Muhamedıuly.
