Qazaqstan Ázerbaıjanǵa 200 myń tonna astyq pen burshaq daqyldaryn eksporttap jatyr

ASTANA. QazAqparat – Májilistiń jalpy otyrysynda «Qazaqstan Úkimeti men Ázerbaıjan Úkimeti arasyndaǵy Ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«2010 jylǵy 29 sáýirden bastap Qazaqstan Halyqaralyq ósimdikter karantıni jáne olardy qorǵaý jónindegi konventsııanyń (HÓKQK) múshesi sanalady. Qazaqstan Respýblıkasynyń qabyldanǵan halyqaralyq mindettemeleri fıtosanıtarııalyq is-sharalar boıynsha halyqaralyq standarttardyń saqtalýyn jáne qoldanylýyn kózdeıdi. Osy talaptardy saqtaý eki el aýmaǵynda tıisti fıtosanıtarııalyq jaǵdaıdy qamtamasyz etedi», - dedi QR Aýyl sharýashylyǵy mınıstri Erbol Qarashókeev

Kelisimdi ratıfıkatsııalaý boıynsha zań jobasyn qabyldaý mynalardy qamtamasyz etedi:

- karantınge jatqyzylǵan ónimniń ornyn aýystyrý kezinde elderdiń fıtosanıtarııalyq qaýipsizdigin qamtamasyz etý maqsatynda odan ári yntymaqtastyqty damytý;

- eki el aýmaǵynyń fıtosanıtarııalyq jaı-kúıi týraly ózara habardar etý;

- zertteý jáne dıagnostıkalaý tájirıbesimen almasý bóliginde ósimdikter karantıni jónindegi ǵylymı uıymdar arasyndaǵy yntymaqtastyqty júzege asyrý.

«Qazirgi kezde Qazaqstannan Ázerbaıjanǵa ósimdik sharýashylyǵy ónimderi eksportynyń jalpy kólemi shamamen 200 myń tonnany qurap otyr. Onyń ishinde negizgi kólem dándi daqyldar (bıdaı, arpa, suly) bolsa, sondaı-aq eksportqa shyǵarylatyn ónimniń biraz bóligi kúrish pen burshaq daqyldarynan turady. Óz kezeginde Ázerbaıjannan Qazaqstan aýmaǵyna jylyna shamamen 14,5 myń tonna jemis-kókónis ónimderi keledi. Ázerbaıjannan keletin ımport negizinen alma, almurt, anar, júzim, jańǵaq jáne tsıtrýs jemisteri túrlerinen turady», - dedi mınıstr.