Qazaqstan Ázerbaıjanda «Dos-Muqasan» fılmin tanystyrdy
ASTANA. KAZINFORM — Bakýde Qazaq kınosynyń aılyǵy bastaldy. Saltanatty is-shara «Dos-Muqasan» mýzykalyq dramasymen ashyldy. Rejısser Aıdyn Sahamannyń fılmi eldiń mýzyka ónerine jańa serpin bergen, qazaq rokynyń negizin qalaýshy tanymal qazaqstandyq ansamblge arnalady.
Іs-shara aıasynda ázerbaıjandyq talantty ánshiler men mýzykanttardyń qatysýymen kontserttik baǵdarlama uıymdastyrylyp, bul kesh qos halyq arasyndaǵy mádenı baılanystyń aıqyn kórinisine aınaldy.
Keshke Qazaqstan Respýblıkasynyń Ázerbaıjan Respýblıkasyndaǵy Tótenshe jáne Ókiletti Elshisi Álim Baıel, shyǵarmashylyq jáne ǵylymı zııaly qaýym ókilderi, dıplomatııalyq korpýs músheleri, BAQ, Bakýde turatyn qazaqstandyqtar men qazaq kınosyn qoldaýshylar qatysty.
«Dos-Muqasan» fılmi Efrat Sháripovtiń stsenarııi negizinde Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Týyndynyń prodıýseri – Aıgúl Baıbek.
Fılm jelisi polıtehnıkalyq ınstıtýttyń stýdentteri qurǵan ansambl tarıhyn baıandaıdy. Jas mýzykanttardyń óner men ǵylym arasyndaǵy kúrdeli tańdaýy, kontsertterge tyıym salý, partııa tarapynan qysym, oqý ornyndaǵy qıyndyqtar sekildi shynaıy ómirlik kedergiler kórinis tabady.
Kınotýyndyda keıipkerlerdiń tarıhı beınesin dál berý úshin akterler naqty prototıpterge saı tańdalǵan. Týyndynyń tarıhı shyndyqqa saı bolý úshin ansambl músheleri Murat Qusaıynov pen Dosym Súleımenov arnaıy keńesshi retinde shaqyrylǵan.
Baký qalasynda ótip jatqan Qazaqstan kınosy aılyǵy aıasynda elimizdiń zamanaýı kınoóneriniń san qyryn tanytatyn basqa da týyndylardyń kórsetilimi josparlanǵan.
Aıta ketelik qazaqstandyq kınorejısser Erevanda álemdik kınoǵa qosqan úlesi úshin marapattalǵan edi.