Qazaqstan, Ázerbaıjan jáne Ózbekstan arasynda týrıster almasý qarqyn alyp jatyr
ASTANA. KAZINFORM — Ázerbaıjannyń Týrızm jónindegi memlekettik agenttigi Qazaqstan men Ózbekstan jetekshi týrıstik kompanııalarynyń ókilderi úshin tanystyrý saparyn uıymdastyrdy, dep habarlaıdy Kazinform menshikti tilshisi vedomstvoǵa silteme jasap.
Bastama eldiń týrıstik áleýetin ilgeriletýge jáne Ortalyq Azııadan týrısterdiń kóbirek aǵynyn tartýǵa baǵyttalǵan.
Sapar aıasynda Ázerbaıjan týrıstik kompanııalary men qonaq úı bıznesiniń 60-tan astam ókilderi qatysqan B2B kezdesý ótti. Osyndaı format naryq qatysýshylary arasynda tikeleı baılanys ornatýǵa jáne birlesken jobalardy damytý perspektıvalaryn talqylaýǵa múmkindik berdi.
Ortalyq Azııadan kelgen qonaqtar birneshe jerge bardy, sonyń ishinde Baký, Shamahy men Baskalda boldy. Sapar barysynda olar negizgi týrıstik ónimder, qonaqúı ınfraqurylymy jáne usynylatyn qyzmet túrlerimen, sonyń ishinde Kaspıı jaǵalaýyndaǵy jaǵajaı demalysymen tanysty.
Vedomstvo málimetinshe, 2025 jyldyń birinshi jartyjyldyǵynda Ázerbaıjanǵa Qazaqstan men Ózbekstannan kelgen týrıster sany 68 myń adamnan asty, bul ótken jyldyń sáıkes kezeńimen salystyrǵanda 15 paıyzǵa artyq. Qazirgi ýaqytta Ázerbaıjan men eki el arasynda tikeleı áýe qatynasy ornatyldy: reıster Qazaqstannyń tórt qalasynan jáne Ózbekstannyń eki qalasynan oryndalyp jatyr.
Sarapshylardyń pikirinshe, Qazaqstan jáne Ózbekstanmen iskerlik jáne mádenı almasýdyń belsendirilýi Ázerbaıjannyń týrızm sektorynyń turaqty ósýine jáne onyń aımaqtyq naryqtaǵy pozıtsııasynyń nyǵaıýyna yqpal etedi.
Buǵan deıin kólik jáne logıstıka salasyndaǵy ázerbaıjandyq sarapshy Qazaqstannyń Aqtaý porty men Ázerbaıjan astanasy Baký arasynda Kaspıı teńizi arqyly joǵary jyldamdyqty jolaýshylar tasymaly qyzmetin iske qosýdyń aýqymdy jobasyn usynǵan bolatyn.