Qazaqstan-Ázerbaıjan matchynan keıin qosymsha avtobýstar shyǵarylady - ákimdik
NUR-SULTAN. QazAqparat – Búgin Qazaqstan quramasy ÝEFA Ulttar Lıgasy aıasynda «Astana Arena» stadıonynda Ázerbaıjan komandasymen kezdesedi. Matchtan soń jankúıerlerdi taratý úshin qosymsha avtobýstar uıymdastyrylady, dep habarlaıdy QazAqparat elorda ákimdiginiń resmı saıtyna silteme jasap.
«Match aıaqtalǵannan keıin qosymsha baǵyttar kúsheıtiledi. Sondaı-aq, «Astana Arena» turaǵynda jáne Qabanbaı batyr dańǵylyndaǵy avtobýs aıaldamalarynda jankúıerlerdi taratý úshin avtobýstar uıymdastyrylady. Jolaqy 90 tg tarıfi boıynsha qolma-qol aqshasyz jasalady», - delingen ákimdik habarlamasynda.
Aıta keteıik, Qazaqstan ulttyq quramasy jańa bas bapker Magomed Adıevtiń basshylyǵymen ÝEFA Ulttar Lıgasynyń 2022/23 jylǵy jańa maýsymyn bastaıdy. Jerebe qorytyndysy boıynsha qazaqstandyqtar Slovakııa, Ázerbaıjan jáne Belarýs komandalarymen 3 «S» dıvızıonynda kúsh synasady.
3 maýsymda Qazaqstan quramasy Ázerbaıjanmen oınaıdy. Oıyn elorda ýaqytymen 20:00-de «Astana Arena» stadıonynda ótedi. Tikeleı kórsetilimdi «QAZSPORT» telearnasynan, qazsporttv saıtynan jáne Qazaqstan.tv mobıldi qosymshasynan kórýge bolady.
Buǵan deıin habarlaǵanymyzdaı, fýtboldan Ulttar lıgasyna qatysatyn Qazaqstan quramasy anyqtalǵan bolatyn.
