Qazaqstan, Ázerbaıjan, Qyrǵyzstan prezıdentteri Astanadaǵy «Máńgilik El» qoıylymyn tamashalaýda (FOTO)
Merekelik kórinisti Elbasy Nursultan Nazarbaev, Ázerbaıjan Prezıdenti Ilham Álıev, Qyrǵyz Prezıdenti Almazbek Atambaev, Túrkııa parlamentiniń tóraǵasy Ismet Iylmaz tamashalaýda.
«Barys» Muz saraıynda teatrlandyrylǵan aýqymdy merekelik qoıylym qazaq jeriniń tarıhyn baıandaıtyn birtýma mýzykalyq-ádebı shyǵarma. Shoýdyń ádebı stsenarııi negizinde QR Prezıdenti N. Nazarbaevtyń «Tarıh tolqynynda» kitaby alynǵan. Qoıylymnyń mýzykalyq qataryna ár zamannyń qazaq avtorlarynyń shyǵarmalary, onyń ishinde ulttyq, sımfonııalyq jáne ekstradalyq mýzyka da kirgen. Qoıylym stsenarııi segiz taraýǵa bólinedi. Onyń árqaısysy Qazaqstannyń damý kezeńderiniń birine arnalady.
Esterińizge sala keteıik, Qazaq handyǵynyń mereıtoıy eki kezeńde ótedi: birinshisi - Astanada, al ekinshisi - Tarazda. Astanadaǵy saltanatty sharalar 11 qyrkúıekte bastaldy. Búgin Memleket basshysynyń qatysýymen Táýelsizdik saraıynda Qazaq handyǵynyń 550 jyldyǵyna arnalǵan saltanatty jıyn ótti. Al tústen keıin Nazarbaev Ýnıversıtetinde «Máńgilik El» taqyrybynda halyqaralyq ǵylymı-tájirıbelik konferentsııa uıymdastyryldy.
Elordada ótetin baǵdarlamaǵa sándi qoldanbaly óner kórme-jármeńkesi, halyq sheberleriniń kórmesi, elimizdiń úzdik shyǵarmashylyq ujymdarynyń kontsertteri kiredi.
Qazaq handyǵynyń 550 jyldyǵy aıasyndaǵy mádenı sharalardyń negizgileriniń biri respýblıka aımaqtarynyń qatysýymen «Qazaq eli» monýmenti mańyndaǵy alańda ótetin etno-aýyl men buqaralyq serýen bolyp tabylady. «Qazaq Eli» monýmenti alańy úsh kúnge elorda turǵyndary men qala qonaqtary tamashalaı alatyn úlken etno-aýylǵa aınalady. Alańda elý kıiz úı tigilip, eki úlken sahna, altybaqandar, sporttyq alańdar, taıqazandar jáne basqa da nysandar ornatylady.
Belgili bolǵandaı, 9 qazanda Tarazda jalǵasatyn ekinshi kezeń aıasynda «Qazaq handyǵyna 550» monýmentin saltanatty túrde ashý, «Kóne Taraz» murajaıynyń ashylýy, sondaı-aq birqatar mádenı sharalar qamtylyp otyr.