Qazaqstan Ázerbaıjan Gran-prıine bılet satyp alý boıynsha óńirde kósh bastady
ASTANA. KAZINFORM — Qazaqstan Ázerbaıjannyń «Formýla-1» Gran-prıine bılet satyp alatyn jankúıerler sany boıynsha Ortalyq Azııa elderi arasynda birinshi orynǵa shyqty, dep habarlaıdy Kazinform agenttiginiń Bakýdegi menshikti tilshisi Baku City Circuit kompanııasyna silteme jasap.
Qazaqstandyq jankúıerlerdiń Bakýde ótetin álem chempıonaty kezeńine degen qyzyǵýshylyǵy jyldan-jylǵa artyp keledi. 2022 jyldan beri Qazaqstannan bılet satylymy jyl saıyn keminde 50 paıyzǵa ósip otyr. Osyndaı qarqynnyń arqasynda Qazaqstan Ázerbaıjan Gran-prıine bılet satyp alýshylar sany boıynsha eń iri 15 sheteldik naryqtyń qataryna turaqty túrde enip keledi.
2025 jyly Bakýdegi jarysqa álemniń 115 elinen jankúıerler bılet satyp alǵan. Ortalyq Azııa memleketteri arasynda satyp alýshylardyń eń kóp úlesi dástúrli túrde Qazaqstanǵa tıesili bolsa, ekinshi orynda Ózbekstan tur.
Bakýdegi kezeńge qyzyǵýshylyqtyń artýy onyń «Formýla-1» kúntizbesindegi erekshe mártebesimen baılanysty. 2026 jyly Ázerbaıjan Gran-prıi óziniń 10 jyldyq mereıtoıyn atap ótedi. Bakýde alǵashqy jarys 2016 jyly Eýropa Gran-prıi ataýymen uıymdastyrylsa, 2017 jyldan beri ol Ázerbaıjan Gran-prıi retinde ótkizilip keledi. Osy ýaqyt ishinde Baký qalalyq trassasy chempıonattaǵy eń tanymal kóshe trassalarynyń birine aınaldy.
Uzyndyǵy 6,003 shaqyrym bolatyn trassa Kaspıı teńizi jaǵalaýyndaǵy uzyn túzý joldy qalanyń tarıhı bóligindegi tar burylystarmen úılestiredi. Eski qala aýmaǵynda trassanyń eń tar jeriniń eni nebári 7,6 metrdi quraıdy.
Sonymen qatar, Baký kezeńi joǵary jyldamdyǵymen erekshelenedi. Keıbir bólikterde bolıdterdiń jyldamdyǵy saǵatyna 350 shaqyrymnan asady. Uzyn túzý joldar, kúrt tejelýler men kúrdeli qalalyq burylystardyń úılesýi Bakýdegi jarysty chempıonattaǵy eń tartysty ári boljaýǵa qıyn kezeńderdiń birine aınaldyrady.
Mereıtoılyq Ázerbaıjan Gran-prıi aıasynda aýqymdy oıyn-saýyq baǵdarlamasy da uıymdastyrylady. Jarys demalysy kezinde Bakýde álemdik estrada juldyzy Ketı Perrı men áıgili dıdjeı ári prodıýser Kelvın Harrıs óner kórsetedi.
Mereıtoılyq Ázerbaıjannyń «Formýla-1» Gran-prıi 2026 jylǵy 24–26 qyrkúıek aralyǵynda Bakýde ótedi.
Buǵan deıin Ázerbaıjan astanasynda klassıkalyq jáne joǵary jyldamdyqtaǵy avtomobılder festıvali ótip, ol bıylǵy avtokólik maýsymynyń eń jarqyn oqıǵalarynyń birine aınalǵany habarlandy.
Sondaı-aq 26 jastaǵy qasapshy Krıstofer Shreder Monakoda ótetin «Formýla-1» jarysyn kórý úshin 22 kúnde 1010 shaqyrym qashyqtyqty júgirip ótkeni belgili boldy.
