Qazaqstan Ázerbaıjan arqyly energııa resýrstary tranzıtin arttyrmaq
ASTANA. KAZINFORM - Qazaqstan men Ázerbaıjan saýda-ekonomıkalyq, ınvestıtsııalyq jáne kólik-logıstıkalyq yntymaqtastyqty odan ári damytý máselelerin talqylady, dep habarlaıdy QR Syrtqy ister mınıstrliginiń baspasóz qyzmeti.
Bul másele Qazaqstannyń Ázerbaıjandaǵy Elshisi Álim Baıel men Qazaqstan-Ázerbaıjan saýda-ekonomıkalyq yntymaqtastyǵy jónindegi Úkimetaralyq komıssııanyń teń tóraǵasy, Ázerbaıjan Premer-Mınıstriniń orynbasary Samır Sharıfovtiń kezdesýinde qaraldy.
Taraptar qazaq-ázerbaıjan qatynastarynyń joǵary qarqynyn atap ótip, birlesken jobalardy iske asyrý barysyn talqylady.
Atap aıtqanda, Alıat portyndaǵy ıntermodaldy termınal qurylysy, Baký astyq termınalyn damytý, Qazaqstannyń temirjol tehnıkasyn jetkizýdi keńeıtý jáne Qazaqstannyń energetıkalyq resýrstaryn Ázerbaıjan aýmaǵy arqyly tranzıtteý kólemin arttyrý máseleleri qarastyryldy.
Sondaı-aq Úkimetaralyq komıssııanyń jumysyn jandandyrýǵa erekshe nazar aýdaryldy.
Taraptar 2024 jyly qurylǵan birlesken ınvestıtsııalyq qordyń múmkindikterin paıdalana otyryp, eki el arasyndaǵy ónerkásiptik kooperatsııany nyǵaıtý perspektıvalaryn talqylady.
Kezdesý qorytyndysy boıynsha taraptar Qazaqstan men Ázerbaıjan arasyndaǵy saýda-ekonomıkalyq baılanystardy odan ári damytýǵa ózara múddeli ekenin rastady.
Osyǵn deıin Qazaqstan men Ázerbaıjan ekonomıkanyń jańa modelin qalaı qalyptastyryp jatqany jóninde saraptama jarııaladyq.
