Qazaqstan azamaty Ýkraına ulttyq kompanııasynyń geologııalyq barlaýyn basqarady

NUR-SULTAN. QazAqparat - Sanjar Jarkeshov Ýkraına «Naftogaz» UAQ ken oryndaryn barlaý jáne óńdeý blogynyń (Head of Upstream Exploration and Development) basshysy bolyp taǵaıyndaldy. Bul týraly QR Ekologııa, geologııa jáne tabıǵı resýrstar mınıstrliginen málim etti, dep habarlaıdy QazAqparat tilshisi.

Sanjar Jarkeshov buǵan deıin QR Ekologııa, geologııa jáne tabıǵı resýrstar vıtse-mınıstri jáne «Qazgeologııa» AQ Dırektorlar keńesiniń tóraǵasy qyzmetin atqarǵan bolatyn. Ol AQSh-tyń Ostın qalasyndaǵy Tehas ýnıversıtetin ınjener-munaıshy mamandyǵy boıynsha bitirgen. Qazaq ekonomıka, qarjy jáne halyqaralyq saýda ýnıversıtetin bitirgen. 11 jyl boıy álemniń 17 elinde halyqaralyq, ınjenerlik, óndiristik jáne basqarýshylyq eńbek jolynan ótken.

S.Jarkeshov 2014 jyly Reseıdiń Sahalın aralyndaǵy Z-40 munaı uńǵymasyn 13 myń metr tereńdikke burǵylap, álemdik rekord ornatqan. 2016 jyly SPE Búkilálemdik ınjener-munaıshylar qaýymdastyǵynyń «Burǵylaý salasyndaǵy aıryqsha jetistigi úshin» syılyǵymen marapattalǵan. Sol jyly Brıtandyq «Injener-Professıonal / Chartered Engineer» ataǵyn ıelengen. Brıtan ınjener-mehanıkter ınstıtýty keńesiniń múshesi. 2017 jyly Ulybrıtanııanyń munaı ındýstrııasyn damytýǵa qosqan úlesi úshin Patshaıym Elızaveta ІІ atyndaǵy syılyqpen marapattalǵan.