Qazaqstan azamaty Germanııada koronavırýs juqtyrdy degen kúdikke ilindi

NUR-SULTAN. QazAqparat – Germanııada Qazaqstan azamaty koronavırýstyń jańa túrin juqtyrdy degen kúdikke ilindi, Onyń otbasy karantınge jatqyzyldy, dep habarlaıdy QazAqparat QR Syrtqy ister mınıstrligine silteme jasap.

«Germanııadaǵy Qazaqstan Elshiligindegi dıplomattarymyzdyń birine ata-anasynyń qonaqqa barǵanyn rastaımyz. Olar Eýropada jeke saparmen júrgen. Birneshe kúnnen keıin dıplomattyń ákesinen koronavırýs juqtyrý belgileri baıqalyp, aýrýhanaǵa jatqyzyldy», - dep habarlady QR Syrtqy ister mınıstrliginiń resmı ókili Aıbek Smadııarov.

Baspasóz hatshysynyń aıtýynsha, qazirgi ýaqytta naýqastyń jaǵdaıy jaqsaryp, jeke palatadan jalpy palataǵa aýystyryldy. Onyń áıeli men uly nemis dárigerleriniń baqylaýynda karantınge jatqyzyldy.

Buǵan deıin, Densaýlyq saqtaý mınıstri Eljan Birtanov koronavırýs ınfektsııasyn juqtyrǵan Qazaqstannyń eki azamaty Germanııadan kelgenin málim etti.

Sondaı-aq, koronavırýs juqtyrǵan úshinshi adam elordada tirkeldi. Naýqas Mılan qalasynan Nur-Sultan qalasyna 12 naýryz kúni kelgen.