Qazaqstan azamattyǵyna 15 myńnan astam adam ıe bolady
ASTANA. Qyrkúıektiń 28-i. QazAqparat /Rýslan Ǵabbasov/ - Búgin Aqordada QR Memlekettik hatshysy - Syrtqy ister mınıstri Qanat Saýdabaevtyń tóraǵalyǵymen QR Prezıdentiniń janyndaǵy Azamattyq máseleler jónindegi komıssııanyń kezekti májilisi ótti.
Taratylǵan málimetterge qaraǵanda, komıssııa jumysynda Qazaqstan azamattyǵyn alýǵa nıetti 15 myńnan asa adamnyń, ıaǵnı olardyń ishinde tarıhı Otanyna oralǵan otandastarymyzdyń jáne TMD men alys shetelderden kelgen basqa ult ókilderiniń qujattary qaraldy. Memlekettik hatshynyń sózine qaraǵanda, Elbasy tıisti Jarlyqqa qol qoıǵannan keıin ótinishterin bergen adamdar elimizdiń azamattary bolady. «Táýelsiz Qazaqstan azamatynyń tól qujatyn alý quqyna ıe bolǵan árbir otbasy úshin bul oqıǵa naǵyz mereke bolyp tabylady», dep atap ótti Q. Saýdabaev.
Memlekettik hatshynyń aıtýynsha, jyl saıyn otandastarymyzdyń sany shamamen 100 myń adamǵa kóbeıip otyr. Bul kórsetkish halyqtyń tabıǵı ósimimen qatar, Qazaqstanǵa túrli elderden kelgen azamattardyń sanynyń edáýir artqanymen joǵarylap otyr.
«Qazaqstan azamattyǵyn alýǵa nıetti adamdar bizdiń memleketimizdiń ózderine ómirdik kepildikti, sondaı-aq ózderiniń balalarynyń aıqyn bolashaǵyn kóredi. Komıssııa usynysyn Memleket basshysy bekitkennen keıin bizdiń jańa otandastarymyzdyń eshqaısysynda da olardyń jasaǵan tańdaýy durys ekendiginde kúdikteri bolmaýy úshin memlekettik organdar barlyq jaǵdaıdy jasaýlary tıis», dedi Memlekettik hatshy.
