Qazaqstan azamattyǵyn alǵym keledi – Reseılik bloger Prezıdent marapatyna ıe boldy

ASTANA. QazAqparat – Reseılik bloger, «Alǵa Peterbýrg» jobasynyń avtory Ivan Chervınskıı eki el arasyndaǵy beıbitshilikti, dostyq pen yntymaqtastyqty nyǵaıtýǵa qosqan úlesi úshin Qazaqstan Prezıdenti Qasym-Jomart Toqaevtan alǵys pen tósbelgi aldy. Prezıdentpen kezdesýi jaıynda bloger Jibek Joly telearnasyna bergen suhbatynda aıtyp berdi, dep habarlaıdy QazAqparat.

Ivan Chervınskıı alǵash ret 2017 jyly Dımash Qudaıbergenniń shyǵarmashylyǵy jóninde beınematerıaldar jarııalaı bastaǵan jáne osylaısha tutas Qazaqstan mádenıetimen tanysqan.

Ánshiniń Qazaqstandaǵy kontsertterine kelip, túrli sheteldik fanattarmen onlaın kontsertter ótkizgen.

Tipti 2021 jyly eki aı boıy dostarynyń shaqyrýymen Qazaqstanda bolǵan.

Qazir Ivan qazaqstandyq mádenıet jáne sport qaıratkerleriniń jetistikteri týraly kóp aıtady. Qazaq tilin úırenip, qazaqtyń ulttyq kıimin kıedi. Shapan – sýyq jáne jeldi aýa raıynda taptyrmas kıim dep esepteıdi.

«Astanaǵa kelgenime tórt kún boldy, al jalpy 6 jyl boıy Qazaqstan týraly blog júrgizip kelemin. Bul eldi jaqsy kóremin, ómirlik josparlarymdy Qazaqstanmen baılanystyramyn jáne óz tarapymnan respýblıkany barynsha keńinen taratýǵa kúsh salamyn. 2017 jyly Qazaqstan jóninde biletinim az edi, al qazir mádenıeti men sportyn jaqsy bilemin. Alty jyl burynǵy ózim sııaqty basqalarǵa da Qazaqstandy tanýǵa kómekteskim keledi», - dedi bloger Jibek Joly telearnasynda.

Qazirgi ýaqytta Ivan Túrkııada turady, onda da qazaq dostary shaqyrǵan. Bloger olarmen qazaqsha sóılesýge tyrysady jáne ázirge turmystyq deńgeıde qazaq tilin túsinedi.

Sondaı-aq, bloger Qazaqstan azamattyǵyn alýdy kópten beri armandaıtynyn aıtty.

«Men kópten beri Qazaqstan azamaty bolýdy armandap kelemin. Osymen altynshy jyl josparlarymdy Qazaqstanmen baılanystyryp kelemin. Meniń barlyq dostarym – qazaqtar. Qazaqstan Prezıdentiniń alǵys haty men tósbelgisi – keremet tosynsyı boldy. Youtube arnamyzdyń statıstıkasy jaqsy, tamasha vıdeolarymyz bar, biraq osyndaı joǵary deńgeıde bizdiń jumysymyzǵa kóńil bóledi dep oılamadym. Maǵan Prezıdent Ákimshiliginen habarlasqanda qatty qobaljydym. Qasym-Jomart Kemelulyn kórgende onyń bolashaqqa baǵdar alǵan, Qazaqstannyń qamyn jeıtin, óte zamanaýı adam ekenin túsindim. Mundaı marapattar alýdyń ózi .lken mártebe», - deıdi Ivan Chervınskıı.

Aıta keteıik, keshe Prezıdent Qasym-Jomart Toqaevtyń tóraǵalyǵymen Qazaqstan halqy Assambleıasynyń HHHІІ sessııasy ótti.

Onda Memleket basshysynyń Jarlyǵymen halyqtar arasynda beıbitshilikti, dostyq pen yntymaqtastyqty nyǵaıtýǵa sińirgen eńbegi úshin birqatar azamat marapattaldy.